Timor-Leste simu vizita husi Ministru Estadu Negósius Estranjeirus Índia, Rajkumar Ranjan Singh, husi loron 30 fulan-setembru to’o loron 3 fulan-outubru tinan 2023.

Durante vizita ne’e, Rajkumar Ranjan Singh, simu husi Prezidente Repúblika, José Ramos-Horta, Primeiru-Ministru, Kay Rala Xanana Gusmão no membru Governu sira seluk, hodi diskute kona-ba abertura embaixada indiana ida iha Dili no hametin kooperasaun iha área oioin entre país rua ne’e.

Desizaun hodi estabelese misaun permanente ida iha Timor-Leste, fó sai husi Primeiru-Ministru indianu, Narendra Modi, durante Simeira ASEAN-Índia iha fulan-setembru tinan 2023.

Rajkumar Ranjan Singh reafirma kompromisu Índia nian hodi apoia dezenvolvimentu Timor iha setór oioin, hanesan agrikultura, mina-rai no gás, saúde no kapasitasaun rekursus umanus. Ko’alia mós kona-ba Índia sei fó bolsa estudu no apoiu ba prosesu adezaun Timor-Leste ba ASEAN.

Iha vizita ofisiál mai Timor-Leste termina ho eventu agradesimentu ida husi Ministru Negósius Estranjeirus no Kooperasaun, Bendito Freitas ba Ministru Estadu Rajkumar Ranjan Singh, ne’ebé konta ho partisipasaun husi membru Governu, korpu diplomátiku no reprezentante husi ajénsia internasionál sira.