Ministru Petróleu no Rekursu Minerais, Francisco da Costa Monteiro, partisipa iha Espozisaun no Konferénsia Internasionál Petróleu Abu Dhabi (ADIPEC, sigla lian inglés), ne’ebé hala’o iha loron 2 to’o loron 5 fulan-outubru, iha kapitál Emiradus Árabes Unidus nian.
Eventu ida-ne’e, organiza kada tinan husi Kompañia Nasionál Petróleu Abu Dhabi (ADNOC, sigla lian inglés) kuaze dékada haat ona, iha tinan ida-ne’e ho tema “Deskarboniza. Lais liu. Hamutuk”. ADIPEC maka pontu sorumutuk globál ba indústria mina-rai no gás, ne’ebé halibur governantes, profisionais, espesialistas no lideres indústria enerjia nian hodi diskute tendénsia, inovasaun no dezenvolvimentu ikus nian iha setór mina-rai no gás.
Iha Konferénsia ida-ne’e, Ministru Monteiro reprezenta Timor-Leste, iha sorumutuk altu-nivel no diskusaun sira kona-ba importánsia tranzisaun enerjétika ba dezenvolvimentu sósiu-ekonómiku no afirma katak país sira ne’ebé iha hela dezenvolvimentu labele ignora sira-nia rekursus mina-rai no gás hodi hatán ba nesesidade boot dezenvolvimentu nian. Kompromisu ne’ebé Timor-Leste asume maka buka atu integra enerjia moos iha ninia mistura enerjétika, iha tempu hanesan sira serbisu hodi deskarboniza sira-nia operasaun mina-rai no gás.
Durante painél ministeriál ne’e “Dalan ba COP28: sustentabilidade no tranzisaun ekuitativa ida” iha ADIPEC 2023, Francisco Monteiro afirma katak “país sira hanesan ita nian, iha ne’ebé nesesidade ba dezenvolvimentu boot tebes no úniku rekursus ne’ebé ita iha hodi uza maka mina-rai no gás, tanba ne’e ita tenke dezenvolve rekursu sira ne’e liuhusi dalan ruma. Loos duni katak, iha Timor-Leste ami hatene kona-ba tranzisaun enerjétika no ami tenta aprezenta mós fonte enerjétika sira seluk, maibé iha tempu hanesan, maske iha setór mina-rai no gás, ami aprezenta hela forma no mekanizmu sira hosi redús efeitu karbonu, hanesan kaptura no armazenamentu karbonu nian”.
Iha diskursu abertura nian, Sultaun Ahmed Al Jaber, Prezidente-Dezignadu husi COP28 no Ministru Emiradus Árabes Unidus, ezije ba indústria, ne’ebé dala barak haree hanesan parte problema, atu bele sai parte solusaun ba dezafiu enerjétiku, hodi afirma katak ida-ne’e hanesan oportunidade hodi hatudu ba mundu papél esensiál ne’ebé nia dezempeña.