Governu Timor-Leste

Primeiru-Ministru, Kay Rala Xanana Gusmão, hatete “Planu Estratéjiku Dezenvolvimentu Nasionál  (PEDN), tau hela vizaun 2020 atu hadia, hakbi’it no tau matan ba instituisaun Estadu ne’ebé reflete duni saída mak povu buka no hakarak. Xefe Governu kasu lia hirak ne’e bainhira hala’o konsulta PEDN loron daruak iha sub-distritu Lete-Foho, distritu Ermera, Kuarta, loron 14 fulan Jullu 2010.

Esplikasaun Primeiru-Ministru nian, hafoin rona uluk Administradór sub-distritu Lete-Foho, Américo Soares, aprezenta kondisaun jerál kona-ba demografia, jeografia no ideolojia polítika, ekonomia, sosiál, kultura, defeza no seguransa iha área sira sub-distritu Lete-Foho, ne’ebé sai hanesan referénsia ida ba Primeiru-Ministru hodi foti desizaun ruma iha Planu Estratéjiku Dezenvolvimentu Nasionál ne’ebé organiza dadaun.

Administradór hatutan katak, sub-distritu Lete-Foho, iha populasaun hamutuk 19,917, ho nia luan 129 km² ne’ebé kompostu hosi suku 8, aldeia 65, maioria populasaun móris hanesan agrikultór, produsaun bo’ot liu mak kafé ne’ebé halo kolleta iha fulan Juñu, Jullu no Agostu.*

Iha okaziaun ne’e mós xefe suku nain 8 ne’ebé hamutuk ho komunidade iha baze hato’o preokupasaun ba iha estrada, eletrisidade, hadia postu sanitáriu no subsídiu ba veteranu sira ne’ebé to’o agora seidauk hetan no kondisaun uma eskola ne’ebé ladún di’ak ba halo prosesu aprendizajen.

Hafoin rona tiha preokupasaun hosi autoridade lokál, Primeiru-Ministru, Kay Rala Xanana Gusmão, akresenta katak, tanba povu (imi) nia móris presiza estrada, ahi, kondisaun eskola di’ak ba imi nia oan sira, uma-móras no uma di’ak ba imi atu hela, tanba ne’e Estadu iha devér no tenke tau matan ba povu nia móris tanba ukun a’an atu povu hetan móris di’ak.

Konsulta PEDN ne’ebé hala’o hosi Primeiru-Ministru, Kay Rala Xanana Gusmão, iha sub-distritu Lete-Foho, akompaña hosi Ministru Saúde, Nelson Martins, Vise-Ministru Finansas, Rui Manuel Hanjam, Sekretáriu Estadu Agrikultura Marcos da Cruz, Sekretáriu Estadu Asisténsia Sosiál no Dezastre Naturál, Jacinto Rigoberto no Sekretáriu Estadu Ambiente, Abílio Lima.

* Tuir dados husi OCHA, Timor-Leste District Atlas, versaun 02, fulan Agistu, tinan 2008. (Hare’e iha internet)