Ministru Prezidénsia Konsellu Ministrus, Agio Pereira, iha loron 29 fulan-setembru tinan 2023, simu Diretór Ezekutivu Arkivu no Muzeu Rezisténsia Timorense (AMRT), Hamar Antoninho Baptista Alves, no ekipa, iha Palásiu Governu, ba sorumutuk dahuluk husikedas AMRT tutela husi Ministru Prezidénsia Konsellu Ministrus.

Durante sorumutuk ne’e, diskute kompromisu ne’ebé kontinua husi AMRT hodi prezerva memória Luta Timor-Leste nian, ho haree liu iha esforsu sira ne’ebé halo ona iha rekolla no prezervasaun dokumentu istóriku sira no konstrusaun ba Jardim da Chama Eterna, espasu foun ida ne’ebé sei moris iha Arkivu no Muzeu Rezisténsia Timorense nia sorin.

Jardim da Chama Eterna sei sai hanesan fatin espozisaun ida atu promove asaun kulturál, sientífika no edukativa sira iha prezervasaun no divulgasaun memória kona-ba luta Rezisténsia Povu Timor-Leste nian, ba rekoñesimentu no valorizasaun veteranu sira, konsolidasaun identidade nasionál, istória kontemporánea Timor-Leste no promosaun pás no respeitu ba Direitus Umanus no bele mós enkuadra memória sira husi períodu rezisténsia Administrasaun Koloniál Portugeza no antesedentes Invazaun Militár Indonézia nian.

Responsavel sira AMRT nian mós buka ona hodi estabelese parseria ho entidade nasionál no estranjeira sira seluk hodi garante prezervasaun ba memória no patrimóniu istóriku nasionál no ninia disponibilizasaun ba públiku ein jerál.