Rezolusaun kona-ba planu asaun nian atu harí Banku Dezenvolvimentu Nasionál Timor-Leste ne’ebé hetan ona aprovasaun husi Konsellu Ministru iha loron 11, fulan Maiu liu ba, maibé projektu kona-ba atu harí Banku ne’e hahú dezenvolve ona iha tinan kotuk.

Iha tinan 2009 osan dólar tokon walu mak aloka tiha ona atu harí banku ida ho klase A, ne’ebé mak sei sai hanesan lisensa bankaria ne’ebé mak hakarak aplika ba Banku Dezenvolvimentu Nasionál, hodi banku ida ne’e konsentra ninia aktividade iha finansia kapital no funsionamenu empreza huirak médiu no boot nian. Ba klase bankaria ida ne’e nian presija kapital sosial ida hamutuk osan dolar tokon nen, “nune’e mak oras ne’e ita iha osan dolar tokon walu atu ita bele hetan banku ida ho klase A”, dehan Cristiano de Costa.

Konabá estrutura husi instituisaun foun ne’e, Ministériu Ekonomia no Dezenvolvimentu oras ne’e forma hela ekipa teknika multidisiplinar nian ida atu prepara prosessu formal ne’ebé sei determina estrutura jenérika banku nian, ka bele dehan, katak ita la’os deit trata lisensa bankaria, ekipa traballu ida ne’e sei hato’o sujestaun konabá detensaun kapital ida ne’ebé mak instituisaun ne’e iha, kalendarizasaun ba aktividade hirak presija no ninia implementasaun kompletu.

Vise-Ministru Ekonomia no Dezenvolvimentu hato’o tan katak “deside tiha ona katak kapital barak liu, minimu porsentu 51%, mak sei sai hanesan aksaun ne’ebé sei pertense ba Estadu, no parte ida seluk porsentu 49% sei destina ba aksionista privadu sira, la’os deit nasional maibé mos internasional”.

Kontratu ba aksionista hirak potensial mos oras ne’e prepara ela ona. Tuir Cristiano da Costa, iha faze ida ne’e, “diskuti hela ona konabá ita atu loke ka limita numeru aksionista nian sira. Iha vantajem no desvantajem sira ba opsaun rua ne’e. Karik ita limita mak ninia vantajem mak desizaun sei konsentra deit ba aksaun privadu nian. Karik ita loke mak ita sei hetan aksionista barak liu no desizaun sei ladun konsentradu no ida ne’e bele difikulta sevisu Konsellu Administrasaun nian liu-liu iha atu hola desizaun no iha hola medida hirak nesesáriu atu hala’o banku ne’e ba oin”.

Fatin ba Banku Dezenvolvimentu ne’e sei iha Díli, ne’ebé mak iha 85% klinete hirak potensial: “Ami identifika tiha ona fatin ne’ebé la kleur tan ami atu reabilita, atu sai nu’udar fatin ba funsionamentu banku nian”, dehan tan Vise-Ministru Cristiano da Costa.