Polisia Nasionál Timor-Leste (PNTL), iha loron 9 fulan Jullu tinan 2010, iha Kuartel-Jerál PNTL nian, komesa hala’o ona restruturasaun iha instituisaun nia laran. Restruturasaun ida ne’e bazeia ba rezultadu deviza ne’ebé mak ofisiál sira hetan iha teste ba promosaun ne’ebé foin halo dadauk liu ba ne’e.

Komandante-Jerál Polisia Nasionál Timor-Leste, Longuinhos Monteiro hateten katak, “Ofisial sira ne’ebé hetan ona tomada de posse tenki sai servidór, protetór no implementadór ba lei no ordem. Ho  ida ne’e hatudu parte naroman ida ba instituisaun ida ne’e atu iha kompromisu nafatin hodi fo seguransa ba povu tuir lei no ordem”.

Aleinde ne’e, husu mós ba Governu atu bele tau matan nafatin ba iha instituisaun ida ne’e hodi dezenvolve ninia kapasidade sai diak liu tan hatutan, Longuinhos.

Restruturasaun ne’e halo atu bele tau ofisiál sira iha pozisaun sira ne’ebé sira nia deviza rasik fo fatin tuir Lei Promosaun PNTL no Regime Kareira PNTL nian. Tomada de pose ida ne’e importante tebes atu hodi bele revitaliza no profisionaliza liu tan instituisaun seguransa nasionál.