Primeiru-Ministru, Kay Rala Xanana Gusmão, halo vizita ida ba Universidade Zhejiang Gongshang, iha Hangzhou, Provínsia Zhejiang, iha Xina, iha loron 22 fulan-setembru tinan 2023. 

Durante vizita ne’e, Xefe Governu simu husi Magnífiku Reitór Universidade Zhejiang Gongshang, Wang Yonggui, hamutuk ho profesór no estudante sira, hodi diskute oportunidade sira kooperasaun nian iha setór edukasaun. 

Universidade Zhejiang Gongshang maka hanesan instituisaun ensinu superiór Xina nian ida ne’ebé ho reputasaun exelente no sistema edukasionál ida ne’ebé estraordináriu.  

Magnífiku Reitór Universidade Zhejiang Gongshang, Wang Yonggui, hato’o dezeju atu estabelese kooperasaun bilaterál ida ho Governu Timor-Leste iha setór edukasionál, ho foku liu iha siénsia umana no área prioritária sira seluk.

Primeiru-Ministru, Kay Rala Xanana Gusmão, agradese ba Xina nia vontade hodi apoia hadi’a kualidade edukasaun iha Timor-Leste no fiar katak kooperasaun ida-ne’e sei hametin liután relasoins entre Xina no Timor-Leste. 

Iha okaziaun ida-ne’e, Primeiru-Ministru Xanana fó palestra sientífika ida ba estudante sira ho tema “Mudansa Forma Ázia nian: hosi Xina ba Timor-Leste”.

Primeiru-Ministru ko’alia-liu ba importánsia Xina hanesan parseira estratéjika durante períodu independénsia, ho apoiu finanseiru ba dezenvolvimentu infraestruturas iha Timor-Leste no iha apoiu ba adezaun Timor-Leste nian ba Asosiasaun Nasoins Sudeste Aziátiku (ASEAN). 

Magnífiku Reitór Universidade Zhejiang Gongshang, Wang Yonggui, afirma katak “Universidade Zhejiang Gongshang iha interese atu estabelese projetu kooperasaun nian ida ho Governu Timor-Leste iha setór edukasionál”, iha área siénsia umana hodi hametin edukasaun hanesan pilár importante ida ba dezenvolvimentu Timor-Leste”. 

Wang Yonggui lembra mós katak Xina no Timor-Leste iha ona relasoins diplomátikas durante tinan 20 no katak kooperasaun entre nasaun rua ne’e kontribui ona ba dezenvolvimentu mútuu.

Reitór ne’e realsa importánsia palestra sientífika hosi Primeiru-Ministru Xanana, ne’ebé konsidera hanesan forma inspirasaun no motivasaun ida ba profesór no alunu sira hodi kompriende vizaun Timor-Leste no Xina nian iha kontestu aziátiku.

Iha vizita ida-ne’e, Xefe Governu akompaña husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, husi Ministru Administrasaun Estatál, Tomás do Rosário Cabral, husi Ministru Planeamentu no Investimentu Estratéjiku, Gastão Francisco de Sousa, Ministru Juventude, Desportu, Arte no Kultura, Nelyo Isaac Sarmento.