Timor-Leste no Xina reforsa lasu kooperasaun ba parseria estratéjika ida ne’ebé abranjente
Primeiru-Ministru, Kay Rala Xanana Gusmão, iha loron 23 fulan-setembru tinan 2023, hala’o sorumutuk bilaterál ida ho Prezidente Repúblika Populár Xina, Xi Jinping, iha Hangzhou, iha Xina, ho objetivu atu fortalese kooperasaun entre país rua ne’e. 
Durante sorumutuk ne’e, diskute kestaun bilaterál no rejionál oioin ba interese mútuu no parte rua konkorda ona atu hametin relasaun entre país rua, dalan ba parseria estratéjika ida ne’ebé abranjente. 
Primeiru-Ministru, Xanana Gusmão, hato’o nia agradesimentu ba Estadu xinés ne’ebé kontinua fornese apoiu dezde Timor-Leste nia tempu rezisténsia to’o ukun-rasik an. Primeiru-Ministru mós lembra sorumutuk ho Prezidente Xi Jinping iha tinan 2014, iha ne’ebé asina akordu kooperasaun bilaterál ida ne’ebé importante no reafirma kontinuasaun hosi nia apoiu ba inisiativa 'Belt and Road', resposta importante ida atu hatán ba nesesidade infraestrutura sira rejiaun ne’e nian. Agradese mós ba apoiu ne’ebé Xina fó mai Timor-Leste durante pandemia COVID-19, inklui fornese vasina no ekipamentu sira, atu apoia país hodi hatán ba krize globál ida-ne’e. 
Timor-Leste iha ona kompromisu atu kontinua hametin ninia relasaun bilaterál sira ho Xina, ho intensaun atu kontribui ba estabilidade no dezenvolvimentu rejionál no globál. Primeiru-Ministru espresa esperansa katak planu kooperasaun nian ida entre Governu Repúblika Populár Xina ho Timor-Leste atu promove inisiativa “Belt and Road” ne’ebé sei finaliza iha tempu badak, ho foku ba área sira hanesan revitalizasaun industriál, dezenvolvimentu infraestruturas, auto-sufisiénsia alimentár no hadi’a kondisaun moris.
Prezidente Xi Jinping reafirma kompromisu Xina nian atu fortalese lasu bilaterál sira no espresa ninia apoiu kontínuu ba Timor-Leste nia dezenvolvimentu.
Xefe Estadu Xina felisita mós Primeiru-Ministru Xanana Gusmão no Prezidente Repúblika, José Ramos Horta, ne’ebé manan iha eleisaun foin lalais ne’e, iha ne’ebé povu timorense fó filafali konfiansa hodi lidera nasaun ne’e. 
Xanana Gusmão aproveita oportunidade ne’e hodi felisita Xina ne’ebé organiza Jogus Aziátikus edisaun da-19 nian, oportunidade importante ida ba foin-sa’e sira hosi Timor-Leste ne’ebé partisipa iha sertame ida-ne’e.
Iha enkontru ida-ne’e, Primeiru-Ministru akompaña husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Administrasaun Estatál, Tomás do Rosário Cabral, Ministru Planeamentu no Investimentu Estratéjiku, Gastão de Sousa, Ministru Juventude, Desportu, Arte no Kultura, Nelyo Isaac no Embaixadór Timor-Leste iha Xina, Abrão Santos.
