Governu Timor-Leste IX, ne’ebé lidera hosi Primeiru-Ministru, Kay Rala Xanana Gusmão, simu pose iha loron 1 fulan-jullu tinan 2023, hodi kontinua dalan dezenvolvimentu sosiál no ekonómiku ba períodu tinan lima oin mai.
Husikedas simu pose, menus hosi fulan tolu, aprova ona diploma hamutuk 54, inklui Proposta Lei rua, Dekretu-Lei 35, Dekretu Governu ida no Rezolusaun Governu 11.
Hafoin konklui tiha elaborasaun ba Programa Governu, tuirmai hetan aprovasaun ho unánime iha Parlamentu Nasionál, Governu konsentra iha preparasaun orgánika Governu Konstitusionál IX nian no Orsamentu Jerál Estadu Retifikativu ba tinan 2023, ne’ebé define despeza totál konsolidada ida ne’ebé prevee ona ho dolar amerikanu billaun 1,77, hodi hamenus montante transferénsia autorizada Fundu Petrolíferu nian husi dolar amerikanu billaun 1,35 ba dolar amerikanu billaun 1,21. 
Iha área saúde, aprova ona Dekretu-Lei kona-ba Institutu Nasionál Farmásia no Produtus Médikus no kona-ba Rejime Asisténsia Médika iha Estranjeiru.
Iha setór petróleu no rekursus minerais, Governu IX hala’o reestruturasaun ida ba setór ne’e, hodi garante efisiénsia ida ne’ebé boot tebes iha setór ida-ne’e, ne’ebé krusiál ba dezenvolvimentu nasaun nian, ho aprovasaun Dekretu-Lei lima no Rezolusaun Governu lima, kona-ba estatutu no lideransa sira Timor Gap, Autoridade Nasionál Petróleu, Autoridade Nasionál Minerais, empreza públika Murak Rai no Institutu Petróleu no Jeolojia nian.
Medida importante seluk mak aprova ona alterasaun dahaat ba Lei n. 11/2009, loron 7 fulan-outubru, ba Divizaun Administrativa Territóriu nian, ho objetivu, tuir prevee ona iha Programa Governu Konstitusionál IX, atu halakon munisípiu Ataúru no kria fali divizaun administrativa foun ida ho primeiru eskalaun, ne’ebé hanaran “Ataúru”, tuir define ona iha artigu da-5 husi Konstituisaun Repúblika, hodi fó-hatene katak Ataúru goza tratamentu administrativu no ekonómiku espesiál.
Iha administrasaun estatál, aprova ona mós projetu Dekretu-Lei ida ne’ebé estabelese Servisu Administrasaun Suku hanesan órgaun apoiu ida ba Xefe Suku no ne’ebé haforsa subvensaun públika ba Sukus hodi finansia rekursus umanus hosi servisu ida-ne’e. Ho alterasaun ida-ne’e permite mós pagamentu ajuda kustu ba lider komunitáriu sira bainhira mobiliza sira ba atividade administrasaun sentrál nian.
Aprova ona mós Dekretu Governu ne’ebé fiksa data sira ba realizasaun Asembleia Aldeia no Konsellu Suku nian iha ámbitu prosedimentu eleisaun ba lider komunitáriu sira, ne’ebé sei realiza iha fulan-outubru no fulan-novembru tinan 2023.
Governu reafirma kompromisu kona-ba implementasaun Estratéjika Investimentu ba Jestaun Rezíduu Sólidu Urbanu iha Dili, ho aprovasaun diploma kona-ba manutensaun interese públiku kontratuál Estadu nian iha ezekusaun kontratu públiku ba fornesimentu ekipamentus iha ámbitu projetu jestaun rezíduu sólidu urbanu iha Dili.
Aprova mós alterasaun daruak ba valór subvensaun ne’ebé oferese husi Estadu ba kandidatu sira Prezidénsia Repúblika nian iha kampaña eleitorál, hodi permite halo kompensasaun totál ba kandidatu sira Prezidénsia Repúblika nian iha situasaun ne’ebé presiza realiza votasaun daruak.
Aprova pagamentu suplementár ida ba funsionáriu, ajente no kontratadu sira ho termu iha Imprensa Nasionál Timor-Leste, I. P. ne’ebé halo servisu ba impresaun boletins votu ba eleisaun deputadu sira ba Parlamentu Nasionál tinan 2023, hanesan kompensasaun ba sira iha kondisaun espesiál ne’ebé limita sira-nia liberdade pesoál no ho serbisu todan tebetebes ne’ebé sira hasoru.
Konsellu Ministrus renova mós mandatu membrus Komité Orientadór no nomeia membrus foun ba Konsellu Diretivu Autoridade Turizmu Timor-Leste nian.
Ikusliu, fó kontribuisaun finanseira ida ba Sekretariadu Tékniku ASEAN iha Jakarta, Indonézia, no aprova donativus ba Repúblika Demokrátika São Tomé e Prínsipe hodi organiza Konferénsia Xefes Estadu no Governu CPLP nian ba da-14, nune’e mós ba Reinu Marrokus hodi apoia iha resposta ba destruisaun ne’ebé kauza husi rai nakdoko.