Iha loron 19 fulan-setembru tinan 2023, Ministra Saúde, Elia A.A. dos Reis Amaral, hala’o sorumutuk bilaterál ida ho Ministru Saúde Kuba, José Angel Portal Miranda, iha Novaiorke, Estadus Unidus Amérika.

Durante sorumutuk ne’e, Ministra Saúde hato’o ona ninia agradesimentu ne’ebé boot tebes ba Governu Kuba, nu’udár país irmaun Timor-Leste nian, ne’ebé durante ne’e fó apoiu ba Timor-Leste iha área saúde. Kooperasaun ida ne’ebé hahú ho sorumutuk entre eis Prezidente Repúblika Kuba, Fidel Castro, ho Prezidente Repúblika Timor-Leste, Kay Rala Xanana Gusmão iha tempu ne’ebá, ne’ebé hala’o iha Kuala Lumpur, iha Malázia, iha tinan 2003.

Tanba kooperasaun ne’ebé estabelese ona entre país rua ne’e, maka bele forma ona médiku sira liu rihun resin no médiku espesialista ruanulu-resin-sia. 

Ministra Saúde afirma filafali kompromisu Governu Konstitusionál IX nian atu kontinua fó prioridade ba dezenvolvimentu rekursus umanus iha setór saúde, liuhusi kooperasaun ho Kuba, hodi abranje espesializasaun no área relevante sira seluk.

Elia Amaral iha Novaiorke hodi partisipa iha sorumutuk sira Altu Nivel nian kona-ba saúde, ne’ebé hala’o iha ámbitu Asembleia Jerál Nasoins Unidas ba da-78. Iha loron 20 fulan-setembru hala’o sorumutuk Altu Nivel kona-ba prevensaun, preparasaun no resposta ba pandemia sira, iha loron 21 sei ko’alia kona-ba kobertura universál saúde nian no ikusliu iha loron 22 fulan-setembru sei hala’o sorumutuk Altu Nivel kona-ba luta kontra tuberkuloze.

Sorumutuk sira-ne’e nu’udár oportunidade ida ba Estadu Membru sira atu dudu ba oin apoiu polítiku no promove abordajen ne’ebé envolve área oioin iha prevensaun no resposta ba pandemia sira. Reuniaun kona-ba kobertura saúde universál nian ho objetivu atu renova esforsu sira hodi garante saúde ba ema hotu-hotu no sai hanesan baze ba polítikas fortalesimentu sistemas saúde nian. Sorumutuk kona-ba tuberkuloze atu hodi revee objetivu sira ne’ebé define ona iha Deklarasaun Polítika tinan 2018 husi Asembleia Jerál Altu Nivel dahuluk nian kona-ba Tuberkuloze, ne’ebé identifika lakuna no solusaun sira hodi aselera progresu iha kombate ba tuberkuloze to’o tinan 2030.

Delegasaun timoroan iha Asembleia Jerál Nasoins Unidas ba da-78 ne’e lidera husi Prezidente Repúblika, José Ramos-Horta no komposta mós husi Ministru Negósius Estranjeirus no Kooperasaun, Bendito dos Santos Freitas. Prezidente Repúblika sei halo ninia diskursu iha eventu ne’e iha loron 21 fulan-setembru.