Loron Tersa feira 13 fulan Jullu, sai hanesan loron Nasionál Timor-Leste iha Expo 2010 Xangai, Xina. Expo ne’e hanesan eventu internasionál ne’ebé bo’ot tebes hodi fó koñese di’ak liu kona-ba kultura rai barak nian iha mundu rai klaran.
Iha eventu ida ne’e mós Timor-Leste iha oportunidade diak hodi hatudu ba ema barak atu koenese realidade no impaktu ita nian iha pavilaun ba mundu, liuliu ba populasaun Xina ne’ebé koenese ita husi ki’ik, tanba ita iha relasaun diak ho rai Xina no vantajen bo’ot ba Timor-Leste atu tuir.
Iha serimónia abertura ne’e Prezidente Repúblika, José Ramos-Horta, hato’o palestra katak, tema ba expo mak halibur elementu sira husi nasaun barbarak atu haree ba meu ambiente nian, iha prosesu dezenvolvimentu ita nian tanba oras ne’e daudaun klima iha mudansa, aliened ne’e mós ba Ásia iha responsabilidade bo’ot atu hatudu nia vizaun tau matan ba meiu-ambiente.
Nune’e mós “Timor-Leste hanesan nasaun foun iha mundu rai klaran foin mak halo tinan walu hodi marka prezensa iha expozisaun mundiál ne’ebé partisipa hosi rai barak, nune’e mós hatudu ba mundu liu husi pavilaun ida ne’e hodi fó sai katak, Timor-Leste nia dezenvolvimentu mai husi tradisaun kultura no natureza meiu-ambiente ne’ebé iha liga malun’’.
Aleinde ne’e iha fatin hanesan Sekretáriu Estadu Konsellu Ministrus, Ágio Pereira, hanesan mós Komisáriu-Jerál ba Expo 2010 Xangai hatete katak, maeske meiu-ambiente hanesan dezafiu bo’ot ida ba rai hotu-hotu ne’ebé bolu ho naran rai indezenvolvimentu, maibé Timor-Leste simu hodi tau matan ba nia rai nia dezenvolvimentu ba futuru.
Iha eventu ne’e hetan partisipasaun hosi Vice-Primeiru-Ministru Kordenadór ba Asuntu Sosiál nian, José Luis Guterres, membru Parlamentu Nasionál, membru Governu, Komisáriu Longuinos Monteiro, Komandante-Jerál PNTL, reprezentante hosi Ministériu relevante sira. Aleinde ne’e mós reprejentante lia nain hosi kultura Distritu 13, dansa kulturál ne’ebé mai husi grupu Lezeval, Timor Furak, grupu Lensu Mutin hosi Suai, grupu Lahane nomós poezia tradisonál.
Iha expozisaun mundiál ne’e hola parte hosi rai hamutuk atus rua haat nulu (240) inkluindu Timor-Leste.