Vise-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, ohin, loron 18 fulan-setembru tinan 2023, prezide sorumutuk koordenasaun nian ida ho ajénsia parseria internasionál sira Governu nian hodi diskute kona-ba problema malnutrisaun no kra’es badak (stunting). Sorumutuk ne’e hala’o iha Palásiu Governu, iha Dili.

Partisipa iha sorumutuk ne’e maka reprezentantes husi ajénsias internasionais, inklui JICA, UNICEF, Banku Mundiál, KOICA, UE, UNFPA, PNUD, WFP, FAO, OMS, ADB no IFC. Sorumutuk ne’e ho objetivu prinsipál atu diskute estratéjia sira hodi enfrenta problema malnutrisaun iha Timor-Leste, ne’ebé daudaun ne’e afeta populasaun 47%. Aleinde malnutrisaun, ko’alia mós kestaun sira ne’ebé relasiona ho dezafius ne’ebé foin-sa’e sira enfrenta, maka hanesan empregu, edukasaun no saúde. 

Objetivu husi sorumutuk ne’e atu garante koordenasaun ba esforsus ne’ebé efikás no bele to’o ba país laran tomak, inklui iha área rurál no remota sira, sei kria Grupu Traballu Tékniku Nasionál nian ida ba Dezenvolvimentu Primeira Infánsia (DPI) no komité diresaun programa nian ida, ho finalidade atu armoniza no monitoriza servisu sira, ho objetivu atu hasa’e efisiénsia iha implementasaun ba programas, tuir prioridades Governu Konstitusionál da-IX nian iha Timor-Leste.

Grupu Traballu Tékniku ne’e sei fornese kontributu tékniku sira hodi elabora Polítika Multisetoriál DPI nian ida no sei apoia Komité Diretivu iha koordenasaun no monitorizasaun ba ninia implementasaun

Vise-Primeiru-Ministru realsa importánsia husi koordenasaun ba esforsu sira hodi garante asaun ida ne’ebé efikás iha terrenu.

 “Relasiona ho kestaun sira-ne’e, maka krusiál atu ita hala’o sorumutuk ne’ebé iha koordenasaun hodi sinkroniza no armoniza ita-nia planu no programa sira, atu nune’e ita bele halo ho forma koordenada no bele monitoriza no avalia ninia rezultadu sira”, Ministru afirma.

WFP, Banku Mundiál no UNICEF hetan mandatu atu elabora planu no programa ida atu komité diresaun ba programa ida-ne’e bele funsiona ho di’ak.