Governu Timor-Leste liu hosi Sekretaria Estadu ba Juventude no Desportu (SEJD) Segunda (12/07) husik atleta nain sanulu (10) husi modalidade Pencak Silat Perisai Diri ba partisipa eventu internasionál Kampeonatu 2010, iha Jakarta-Indonesia, durante loron ualu (17-24).

Xefe Gabinete Sekretaria Estadu ba Juventude no Desportu Nino Pereira, ne’ebé reprezenta Sekretáriu Estadu, Sr. Eng. Miguel Manetelo  iha ninia intervensaun afirma, “Governu iha nafatin kompromisu atu tulun federasaun desportu hotu hodi tuir eventu internasionál. Hakarak ka lakohi SEJD iha nafatin obrigasaun  atu lori atleta timor-oan hodi tuir eventu internasionál sira, atu  nune’e Timor-Leste mós bele partisipa atu  mantein nia ejisténsia iha ajenda kompetisaun internasionál”.

Iha fatin hanesan Prezidente Federasaun modalidade Pencak Silat Perisai Diri, Custodio da Silva iha serimónia despedida relata katak, “partisipasaun sira nian iha eventu internasionál Kampeonatu Jakarta ne’e nu’udar oportunidade ba daruak nian, ne’ebe oportunidade dahuluk sira partisipa iha tinan 2007, ho apoiu hosi Governu liu husi Sekretaria Estadu ba Juventude no Desportu hamutuk U$.2000, no ba tinan 2010 ne’e, sira hetan U$ 7000. Sira sei hetan rezultadu ne’ebé diak iha eventu ne’e, basá iha tinan 2007, ho rekursu ne’ebe ki’ik, sira konsege tama to’o iha meius finais. Ne’e duni tinan 2010 ne’e, sira sei esforsu para oinsá bele aumenta tan rezultadu ne’ebé mak iha tiha ona, hatutan Custodio.

Atleta nain 10 ne’ebé partisipa iha eventu ne’e mak Hermenegildo, Mateus M. da Silva, Domingos da Costa Ribeiro, Ponciano da Costa Gaio, João Baptista, Heribertus Amumut, Gonsalo Dias Marques, Venancio G Lopes, João da Costa no Afonso N da Silva Soares.