Iha esforsu hamutuk ne’e hodi hadi’a saúde no nutrisaun foin-sa’e timoroan sira nian, Governu Timor-Leste, reprezenta husi Vise-Ministru ba Reforsu Institusionál Saúde, José dos Reis Magno, iha loron 8 fulan-setembru tinan 2023, simu ofisiálmente ai-moruk suplementu sulfatu ferru no ásidu fóliku millaun ualu husi UNICEF, ho apoiu finanseiru husi Governu Japaun.

Objetivu husi suplementu sira-ne’e atu hadi’a saúde nutrisionál ba foin-sa’e timoroan sira husi idade 12 to’o 16. Inisiativa ne’e, ne’ebé finansia husi Governu Japaun no implementa husi UNICEF, ho objetivu atu kombate anemia, kondisaun ida ne’ebé afeta ba labarik ho idade menus husi tinan lima ho porsentu 63 no ba foin-sa’e sira ho idade hosi 14 to’o 19 ho porsentu 32 iha Timor-Leste.

Vise-Ministru José dos Reis Magno hato’o “ninia agradesimentu boot ba apoiu UNICEF no Governu Japaun nian ba esforsu Governu Timor-Leste hodi hadi’a nutrisaun ba foin-sa’e sira” no destaka katak “parseria ida-ne’e hatudu efikásia kooperasaun iha abordajen ba dezafiu krítiku saúde nian”.

Distribuisaun ba suplementu sulfatu ferru no ásidu fóliku sei abranje ba foin-sa’e rihun sianulu-resin-lima iha munisípiu oioin, inklui Covalima, Lautein, Likisá no Manufahi, aleinde Rejiaun Administrativa Espesiál Oe-Kusi Ambenu. Foin-sa’e sira sei hetan asesu gratuitu ba suplementu sira ne’e iha eskola no iha sesaun sira sensibilizasaun komunitária nian ne’ebé realiza husi membrus Grupus Apoiu ba Maternidade. 

Apoiu nutrisionál ida-ne’e importante tebetebes hodi prevene anemia ne’ebé mosu tanba ferru menus no ninia konsekuénsia longu prazu ba foin-sa’e sira-nia saúde. Hataan ba nesesidade nutrisionáll adolexente sira nian liuhusi suplementasaun semanál ferru no ásidu fóliku ne’ebé ajuda abordajen siklu moris nian atu hamenus deznutrisaun.

Tetusya Kimura, Embaixadór Japaun nian iha Timor-Leste, destaka katak “’loron 1000 dahuluk’, loron ne’ebé husikedas konsesaun to’o labarik ne’e kompleta tinan rua, ne’e maka períodu krítiku iha ema ida nia moris ne’ebé bele determina ninia moris tomak”.

Reprezentante UNICEF iha Timor-Leste, Bilal Aurang Zeb Durrani afirma katak “eventu ida-ne’e reprezenta ami-nia kompromisu koletivu ho investimentu sustentável iha saúde, nutrisaun no moris-di’ak ba foin-sa’e sira, hodi proteje sira kontra deznutrisaun oioin”.

Serimónia entrega suplementus ne’e konta ho prezensa husi diretór nasionál sira husi Ministériu Saúde no Ministériu Edukasaun, nomós reprezentante sira husi korpu diplomátiku, Uniaun Europeia, ajénsias Nasoins Unidas nian no Organizasaun Naun Governamentál sira.