Governu Timor-Leste, liuhusi Sekretáriu Estadu Komunikasaun Sosiál, Expedito Dias Ximenes, no Reprezentante UNICEF nian iha Timor-Leste, Bilal Aurang Zeb Durrani, iha loron 11 fulan-setembru tinan 2023, asina ona akordu ida ne’ebé estabelese planu serbisu kontínuu ida ba tinan rua ba diseminasaun direitus labarik nian no internet segura.
Planu ida-ne’e iha komponente ida kona-ba sensibilizasaun ba utilizasaun internet ida ne’ebé saudavel no ida-seluk kona-ba kapasitasaun ba rekursus umanus no mós fornesimentu ekipamentu ba estasaun rádiu komunitáriu nasionál sira, ho objetivu atu kria no habelar informasaun sira ne’ebé étika no atualizada kona-ba direitus labarik nian. 
Husikedas tinan 2004, UNICEF halo ona kolaborasaun ho estasaun rádiu komunitáriu sira no Governu hodi utiliza estasaun rádiu komunitáriu hamutuk 18 iha Timor-Leste laran tomak ba diseminasaun mensajen pozitiva sira kona-ba rejistu nasimentu (moris), paternidade, saúde no nutrisaun, saneamentu no ijiene, edukasaun iha primeira infánsia, prevensaun violénsia kontra feto, feto-klosan no labarik sira, nune’e mós prevensaun no vasinasaun kontra COVID-19.
Sekretáriu Estadu manifesta ninia satisfasaun “katak planu ida-ne’e inklui fortalesimentu kapasidade funsionáriu sira husi estasaun rádiu komunitáriu sira, hodi fó hanoin katak sira mak iha liña frente hodi fahe informasaun sira kona-ba direitus labarik nian iha nivel komunitáriu, inklui ema sira ne’ebé hela iha área sira ne’ebé remota liu.”
Expedito Ximenes destaka katak “revizaun ba planu ida-ne’e koloka prioridade foun ba sensibilizasaun no dezenvolvimentu diretrizes ba utilizasaun internet ida ne’ebé saudavel no redusaun risku sira ne’ebé relasiona ho uzu internet husi labarik sira”.
Bilal Aurang Zeb Durrani espresa ona vontade “UNICEF nian hodi servisu hamutuk ho SECOMS no entidade governamentál sira seluk ba redusaun risku utilizasaun internet husi labarik sira, atu internet ne’e sai hanesan fatin ida ne’ebé seguru hodi aprende, sosializa no espresa”, fó hanoin katak “ho diseminasaun teknolojia informasaun no komunikasaun nian, labarik sira iha país laran tomak esplora plataforma online oioin ho objetivu aprendizajen no hodi halo ligasaun ho nia maluk sira”.