Governu Timor-Leste, liuhusi Ministériu Negósius Estranjeirus no Kooperasaun (MNEK), hala’o semináriu ida ho tema “Timor-Leste nia Estratéjia no Asaun ba Adezaun ida ne’ebé Sustentavel ba ASEAN: Dezenvolvimentu Umanu, Sustentabilidade no Kreximentu Ekonómiku”. Eventu ne’e, hala’o husi espesialista dezenvolvimentu rekursus umanus, Bob Audrey, iha Salaun Nobre MNEK nian no sura ho partisipasaun husi membrus Governu Konstitusionál IX, funsionáriu governamentál, reprezentante sira husi setór privadu no sosiedade sivíl. 

Eventu ne’e hala’o iha Salaun Nobre MNEK nian no sura ho partisipasaun husi membrus Governu Konstitusionál IX, funsionáriu governamentál, reprezentante sira husi setór privadu no sosiedade sivíl.

Semináriu ne’e, hahú hosi pontu situasaun ba implementasaun roteiru adezaun nian ba ASEAN, ho objetivu sentrál atu promove diskusaun abranjente ida kona-ba relasaun intrínseka entre kreximentu ekonómiku no dezenvolvimentu umanu. Iha semináriu ne’e identifika ona fatór krusiál sira ba progresu autosustentável no realsa mós priorizasaun dezenvolvimentu umanu hanesan dalan esensiál ida ba kreximentu ekonómiku ne’ebé sustentavel. 

Iha abertura semináriu nian, Ministru Prezidénsia Konsellu Ministrus no Ministru Negósius Estranjeirus ein ezersísiu, Agio Pereira, realsa inisiativa importante ne’ebé kria husi Primeiru-Ministru, Xanana Gusmão, no agradese ba partisipasaun membrus Governu no sosiedade sivíl nian.

Ágio Pereira mós ko’alia prosesu preparasaun Timor-Leste nian atu sai membru plenu direitu ba ASEAN no aprezenta Bob Aubrey, espesialista dezenvolvimentu rekursus umanus nian ne’ebé kolabora hela ho Governu Timor-Leste hodi formula estratéjia no polítika sira ba dezenvolve kapitál umanu, liuliu iha kontestu adezaun ba ASEAN iha futuru. 

Bob Aubrey hanesan fundadór no Prezidente Konsellu Konsultivu Organizasaun Dezenvolvimentu Umanu ASEAN (ODH-ASEAN) nian, organizasaun dahuluk iha ASEAN ne’ebé serbí komunidade profisionál sira dezenvolvimentu umanu nian no ne’ebé serbisu ho empreza no organizasaun sira hodi define estratéjia dezenvolvimentu umanu.

Durante semináriu ne’e, aprezenta programa “Futuru Lider ba ASEAN” (Futuros Líderes para a ASEAN), inisiativa ida ba aselerasaun lideransas ne’ebé ho eskala boot ba Timor-Leste iha ámbitu prosesu adezaun nian ba ASEAN. Programa ida-ne’e, sei lidera husi Vise-Ministra ba Asuntus ASEAN, Milena Maria da Costa Rangel, programa refere kria husi Bob Audrey ho apoiu husi Organizasaun Dezenvolvimentu Umanu ASEAN no Organizasaun Dezenvolvimentu Umanu Timor-Leste. 

Sei hala’o “Futuru Lider ba ASEAN” hanesan programa ida ne’ebé iha tutela Institutu Nasionál Administrasaun Públika (INAP) nian no sei inklui atividade oioin ne’ebé hala’o husi espesialista sira, tantu iha Timor-Leste nune’e mós iha país sira ASEAN nian. Objetivu prinsipál husi programa ida-ne’e atu promove dezenvolvimentu ba lider sira ne’ebé bele kompriende no kolabora ho ASEAN, aselera fluksu lideransa nian hodi aliña fluksu lideransa ne’e ho padroins ASEAN no garante katak lider sira Timor-Leste nian hanesan ho lider omólogu sira iha país sira ASEAN nian. 

Prezidente Repúblika, José Ramos Horta, iha enserramentu semináriu nian, fó énfaze ba importánsia hodi dezenvolve no hametin kapasidade rekursus umanus rai-laran nian, liuliu iha kontestu preparasaun nian atu sai membru plenu direitu ba ASEAN.