Serimónia lansamentu Brosura kona-ba Partisipasaun Feto sira nian iha Eleisaun Komunitária ba tinan 2009 no aprezentasaun ofisiál kona-ba rezultadu husi resensiamentu Eleitorál no Atualizasaun ba Base Dadus 2010 nian hala’o iha Sala Konferénsia Hotel Timor nian, iha loron 05, fulan Jullu.

Rezultadu husi Resensiamentu Eleitorál ba tinan 2010 hatudu katak eleitór besik porsentu 50% ne’ebé rejistra sira nia naran mak feto sira. Atu hatete iha ne’e katak, rejistu ne’e halo hodi hetan kartaun eleitór, ne’ebé importante hodi ezerse nia direitu síviku no direitu votu nian. Prosesu resensiamentu aprezenta mós oportunidade foun ida atu feto sira bele halo parte iha banku dadus nian iha nível nasional.

Hola parte iha serimónia ne’e mak, Prezidente República Demokrátika Timor-Leste, José Ramos Horta ne’ebé fó parabeins ba STAE (Sekretariadu Tékniku Administrasaun Eleitorál) tanba iha inisiativa hodi halo produsaun ba Brosura nomós tanba halo hetan susesu iha prosesu Resensiamentu Eleitorál ba tinan 2010. Señor Prezidente fó agradesimentu mós ba apoiu husi Nasoens Unidas, no nia apela ba komunidade doadór sira atu bele fó nafatin apoiu ba iha área eleitorál UNDP nian.

Aleinde prezensa husi Xefi Estadu iha serimónia ida ne’e, marka prezensa iha serimónia ida ne’e mós mak Reprezentante Espesiál Sekretáriu-Jeral Nasoens Unidas nian ba Timor-Leste (SRSG), Ameerah Haq; Ministru ba Administrasaun Estatal no Ordenamentu Territóriu, Arcângelo Leite; Director STAE, Tomás Cabral; Xefi Suku nain 6 husi nain 10 ne’ebé hili iha tinan 2009 no eleitora ne’ebé tinan boot liu ne’ebé rejista iha país ida ne’e mak, Sra. Balbina Mendonça Côrte-Real, ho tinan 92.