Timor-Leste, reprezenta husi Primeiru-Ministru, Kay Rala Xanana Gusmão, partisipa iha Simeira Asosiasaun Nasoins Sudeste Aziátiku (ASEAN) ba da-43, no sorumutuk sira ne’ebé relasiona ho simeira ne’e, ne’ebé hala’o iha Jakarta, Indonézia, iha loron 5 to’o loron 7 fulan-setembru. 

Simeira ida-ne’e marka mandatu ikus prezidénsia rotativa husi Repúblika Indonézia no pasa fali ba Repúblika Demokrátika Populár Laos nian.  Iha fulan sia ikus nian, Indonézia lidera Asosiasaun Nasoins Sudeste Aziátika ho tema “ASEAN ne’ebé Importante: Episentru Kreximentu”. 

Prezidente Indonéziu, Joko Widodo, iha ninia diskursu enserramentu nian, apela atu transforma rejiaun Indo-Pasífiku sai “teatru pás no inkluzaun” nian ida no insentiva nasoins ASEAN nian atu “fó liman ba malu, hodi enfrenta dezafiu sira, transforma dezafiu sira sai oportunidade, transforma rivalidade sira sai kolaborasaun, transforma eskluzividade sai inkluzividade no transforma diferensa sira sai unidade”. 

Primeiru-Ministru Laos, Sonexay Siphandone, afirma katak “Laos sei kontinua promove konkista sira ne’ebé ASEAN alkansa ona durante mandatu ne’ebé prezide husi Indonézia” no durante nia prezidénsia, “Laos sei konsentra ba promosaun konektividade nian, buka oportunidades kooperasaun no rezolusaun dezafiu sira iha kontestu jeopolítiku globál ne’ebé nafatin iha mudansa”. 

Xefe Governu Laos mós kompromete “atu koopera hodi hadi’a kapasidade lideransa, fortalese unidade, garante pás, estabilidade no dezenvolvimentu, promove transformasaun dijitál no integrasaun ekonómika no mós enfrenta dezafiu sira alterasoins klimátikas nian”.

Aleinde Simeira ASEAN da-43 ne’e hala’o mós konferénsia 12, liuliu sesaun plenária, sorumutuk informál no Simeira individuál sira ASEAN nian ho parseiru sira, hanesan Xina, Koreia Súl, Japaun, Estadus Unidus Amérika, Kanadá, Índia, Austrália, Nasoins Unidas, Ázia Orientál no simeira ida hamutuk ho Xina, Japaun, Koreia Súl.

Primeiru-Ministru, Kay Rala Xanana Gusmão, partisipa iha sesaun plenária no mós iha sorumutuk sira ne’ebé relasiona ho simeira ne’e.

Iha ninia intervensaun sira, Xefe Governu, garante “Apoiu Timor-Leste nian, hanesan membru potensiál ho direitu plenu, ba sentralidade no unidade ASEAN nian “no hato’o “ninia apresiasaun kle’an ba apoia ne’ebé metin husi Estadus-Membrus hotu ASEAN nian no parseirus ASEAN nian ba Timor-Leste nia adezaun-plena”.

Primeiru-Ministru mós reafirma katak “Timor-Leste iha valór sira hosi nasoins hotu ne’ebé respeita no defende prinsípiu sira demokrasia no direitus umanus nian, nune’e mós direitu internasionál, bainhira hala’o relasoins internasionais”.

Delegasaun nasionál inklui Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas, Ministru Interiór, Francisco da Costa Guterres, no Vise-Ministra ba Asuntus ASEAN, Milena Maria da Costa Rangel.