Durante reuniaun ne’e Asosiasaun Nasoins Sudeste Aziátiku (ASEAN) – Índia, iha marjen Simeira ASEAN nian ba da-43 ne’ebé realiza ohin iha Jakarta, Indonézia, Primeiru-Ministru índia nian, Narendra Modi, fó-sai desizaun hodi estabelese Embaixada Indiana ida iha kapitál Timor-Leste nian, Dili.

Desizaun ida-ne’e nu’udar parte ida hosi planu pontu 12 ba relasoins Índia nian ho rejiaun ne’ebé aprezenta hosi Primeiru-Ministru Narendra Modi, ho objetivu atu hametin kooperasaun no relasoins diplomátikas iha rejiaun leste aziátiku nian. Planu ida-ne’e inklui área oioin, husikedas konektividade to’o infraestrutura públika dijitál no asoins ba kombate terrorizmu. 

Iha komunikadu ida ne’ebé publika ona iha website Ministériu Negósius Estrangeirus Indianu, temi katak “desizaun ida-ne’e reflete importánsia ne’ebé Índia fó ba ASEAN no ninia relasoins ho Timor-Leste” no hatutan katak “desizaun ne’e Timor-Leste no membru sira ASEAN nian simu ho laran-ksolok”.

Primeiru-Ministru Kay Rala Xanana, partisipa iha Simeira ASEAN nian ida-ne’e ba da-43, reprezenta Timor-Leste nu’udar país observadór organizasaun nian ne’ebé iha hela dalan ba adezaun plena.