Simeira ASEAN ba da-43 hahú ho kompromisu ba fortalesimentu organizasaun ne'e no mós apelu hodi apoia adezaun plena Timor-Leste nian
Simeira Asosiasaun Nasoins Sudeste Aziátiku (ASEAN) ba da-43 hahú iha loron 5 fulan-setembru, iha Jakarta, Repúblika Indonézia nian, nasaun ne’ebé daudaun ne’e prezide organizasaun ne’e. Eventu ne’e konta ho partisipasaun Timor-Leste nian, ne’ebé reprezenta husi Primeiru-Ministru, Kay Rala Xanana Gusmão, ho tema “ASEAN ne’ebé Importante/ASEAN matters: Episentru Kreximentu”. 
Iha abertura simeira ne’e nian, Prezidente Repúblika Indonézia, Joko Widodo, lori Estadu-Membru hotu-hotu nia naran, reafirma “kompromisu hodi hametin liután ASEAN hanesan organizasaun ida ne’ebé forte no lais, ne’ebé iha kapasidade no efikásia institusionál ne’ebé forte hodi hasoru dezafiu atuál sira no nafatin relevante ba ninia povu, rejiaun no mundu, enkuantu kontinua serbí hanesan episentru kreximentu no prosperidade ba rejiaun ne’e no rejiaun sira seluk”. 
Jokowi mós ko’ alia-liu nesesidade “atu mantein no promove pás, seguransa no estabilidade iha rejiaun ne’e, no mós rezolusaun pasifika ba disputa sira”, tuir prinsípiu sira(…) direitu internasionál nian”. 
Kona-ba prosesu adezaun plena Timor-Leste nian ba ASEAN, Prezidente ASEAN hatudu ninia apoiu, hodi hato’o konfiansa kapasidade Timor-Leste nian hodi kumpre kritériu sira ne’ebé estabelese ona. Joko Widodo “enkoraja Estadus-Membrus ASEAN no parseiru esternu sira atu fó sira-nia apoiu tomak ba Timor-Leste iha kumprimentu ba kritériu sira roteiru nian iha adezaun plena Timor-Leste nian ba ASEAN, liuhusi fó asisténsia ba dezenvolvimentu rekursus umanus no kualkér apoiu seluk ne’ebé nesesáriu no relevante”. 
Iha loron liubá, durante Simeira Negósius no Investimentus ASEAN nian ne’e, Primeiru-Ministru, Xanana Gusmão, ko ’alia-liu importánsia adezaun plena Timor-Leste nian ba ASEAN, hodi “fó konfiansa no seguransa ba empreza no investidór estranjeiru sira atu investe iha Timor-Leste, ne’ebé konsidera “fundamentál ba kreximentu ekonómiku Timor-Leste nian, hodi kria empregu sira no atu moderniza no transforma ita-nia nasaun nia estrutura ekonómika”.
Simeira ASEAN ba da-43 sei kontinua to’o loron 7 fulan-setembru tinan 2023, iha ne’ebé delegasaun timoroan, lidera husi Primeiru-Ministru, sei hala’o enkontru bilaterál ho Xefes Estadu no Governu ASEAN nian.
Delegasaun nasionál ne’e, inklui Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas, Ministru Interiór, Francisco da Costa Guterres, no Vise-Ministra ba Asuntus ASEAN, Milena Maria da Costa Rangel.
