Rezultadu hirak ba dahuluk Sensu 2010 nian, ne’ebé sei hala’o iha loron 11 to’o loron 25 fulan Jullu, tenki mosu hafoin fulan tolu liu tiha sensu, ka bele dehan, iha Outubru rezultadu hirak preliminár nian hahú mosu ona. Tuir norma, tratamentu ba tipu informasaun ida ne’e sei sai kleur, maibé Governu hakarak atu hala’o lalais prosesu ne’e, tuir Emília Pires esplika: “Hanesan bain-bain, presiza fulan haat atu bele hatama dadu hirak tomak ba iha mákina nia laran, maibé tanba ita hakarak atu hatene lalais kona-ba dadu hirak ne’e atu ita bele iha ideia ida kona-ba populasaun iha Timor-Leste, no hirak seluk tan,mak ita sei fó-servisu ba ema operadór na’in 80 no sira mak sei hatama dadu hirak ne’e ba iha mákina. Tanba ne’e mak ami hanoin katak iha Outubru ita bele ona hetan rezultadu hirak preliminár nian. Iha tinan klaran 2011 nian, mak ita sei bele hetan relatóriu finál.”

Atu rezultadu sira bele sai koretu liután, mak Ministra Finansas husu ba populasaun tomak atu bele partisipa iha aktividade nasionál ida-ne’e hodi labele haluha loron ba dahuluk sensu nian, ne’ebé mak bele sai nu’udar referénsia ba iha loron hirak tuir mai nian: “Hau husu ba ema hotu ne’ebé mak hela iha Timor-Leste atu partisipa iha sensu 2010 nian ida-ne’e, ne’ebé mak sei hala’o hahú hosi loron 11 Jullu no remata iha loron 25 Jullu. Labele haluha katak pergunta sira refere ba iha loron 11 Jullu. Karik iha ema mak la hetan entrevista iha loron ida ne’e, maibé hetan entrevista iha loron 12, 13, 14, ba oin, sira tenki hatán hanesan iha loron 11 nian.

Tanba ne’e mak, hau husu atu ema hotu bele hanoin kona-ba saída mak sira hetan iha loron 11 no atu bele partisipa iha sensu 2010 nian ida-ne’e.”

 

Ba informasaun seluk tan bele rona entrevista ho Ministra Finansas iha programa “Adeus Konflitu, Bem-vindu Dezenvolvimentu”, iha Rádiu Timor-Leste, iha frekuénsia 91.7 – iha Lian Portugés, Sábadu, Loron 10 Jullu, tuku 19:30.