Primeiru-Ministru, Kay Rala Xanana Gusmão, no Prezidente Repúblika Indonézia, Joko Widodo, hala’o sorumutuk bilaterál ida iha Palásiu Merdeka, iha Jakarta, Indonézia, iha loron 4 fulan-setembru tinan 2023. Durante enkontru ne’e, sira diskute kona-ba kompromisu kontínuu Indonézia nian hodi apoia adezaun Timor-Leste ba Asosiasaun Nasoins Sudeste Aziátiku (ASEAN) no fortalese rekursus umanus no ekonomia nasionál. 

Jokowi afirma katak “Indonézia ho konsistente apoia kandidatura Timor-Leste ba adezaun no implementasaun planu adezaun nian, inklui liuhusi dezenvolvimentu kapasidades rekursus umanus Timor-Leste nian.” 

Prezidente Indonézia mós felisita Xanana Gusmão ba nia nomeasaun nu’udar Primeiru-Ministru Timor-Leste foin daudaun ne’e, no afirma katak “Indonézia no Timor-Leste hanesan nasaun maun-alin, tanba ne’e tenke hametin ita-nia parseria”. 

Xanana Gusmão agradese ba konvite Prezidente Jokowi nian hodi partisipa iha Simeira ASEAN ba da-43 no defende importánsia adezaun plena Timor-Leste nian ba ASEAN hodi aumenta konfiansa no investimentu iha nasaun ne’e, atunune’e promove kreximentu ekonómiku no dezenvolvimentu nasionál.

Iha sorumutuk ne’e, Primeiru-Ministru Xanana, hetan akompañamentu husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, husi Ministru Negósius Estranjeirus no Kooperasaun, Bendito dos Santos Freitas, husi Ministru Interiór, Francisco Guterres, no husi Vise-Ministra ba Asuntus ASEAN, Milena Rangel.