Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, hala’o vizita ofisiál ida ba Reinu Kamboja iha loron 28 no 29 fulan-agostu. Durante vizita ida-ne’e, hala’o sorumutuk ho Primeiru-Ministru no membrus Governu foun kambojanu nian, ne’ebé simu pose iha loron 1 fulan-agostu liubá, ho objetivu atu hametin lasu kooperasaun bilaterál nian. 

Iha sorumutuk sira ho Primeiru-Ministru Reinu Kamboja nian, Hun Manet, Ministra Komérsiu, Cham Nimul, no Ministru Turizmu, Sok Soken, diskute tema oioin ba interese mútuu, ho énfaze ba kooperasaun iha área edukasaun, ekonomia, komérsiu no turizmu entre Timor-Leste ho Kamboja. 

Primeiru-Ministru Kamboja reafirma apoiu husi ninia país ba adezaun Timor-Leste nian ba ASEAN no ba Organizasaun Mundiál Komérsiu, nune’e mós inisiativa rejionál no globál sira seluk. Haree ba istória relasaun diplomátika entre país rua ne’e, hahú iha tinan 2002, ne’ebé destaka hanesan aliserse ida ne’ebé metin ona hodi hakle’an kooperasaun.

Xefe Governu Kamboja nian ne’e hato’o mós ninia vontade hodi kontinua ba programa bolsa estudus nian, ne’ebé fasilita ona estudante timoroan na’in-10 hodi tuir formasaun iha ninia país. 

Vise-Primeiru-Ministru hato’o agradesimentu Timor-Leste nian ba apoiu Kamboja nian hodi simu Timor-Leste nu’udar membrus ASEAN ba da-11, nune’e mós ba estatutu observadór ne’ebé fó ona ba Timor-Leste. Kalbuady Lay nia determinasaun hodi dudu kooperasaun komersiál, liuliu iha ámbitu komérsiu foos nian.

Enkontru ho Ministra Komérsiu, Cham Nimul, hamosu kompromisu foun ida hodi halais Memorandu Entendimentu ne’ebé asina ona iha tinan kotuk kona-ba komérsiu foos fortifikadu entre Timor-Leste ho Kamboja. Vise-Primeiru-Ministru mós salienta importánsia ba kriasaun fórun ekonómiku nian sira atu promove envolvimentu setór privadu país rua ne’e nian no esplora oportunidades kooperasaun.

Iha sorumutuk ho Ministru Turizmu, Sok Soken, diskute elaborasaun ba Memorandum Entendimentu ida kona-ba kooperasaun iha setór turizmu. Memorandum ida-ne’e ho nia objetivu atu dudu interkámbius kulturais no ekonómikus, estabelese relasoins interpesoais ne’ebé metin liután no hametin benefísius mútuus (benefísiu ba malu), nune’e mós promove konfiansa ida ne’ebé boot-tebes entre nasaun rua ne’e.