Primeiru-Ministru, Kay Rala Xanana Gusmão, iha loron 28 fulan-agostu tinan 2023, hala’o sorumutuk ho Bob Aubrey, espesialista ba Dezenvolvimentu Rekursus Umanus husi Asosiasaun Nasoins Sudeste Aziátiku (ASEAN), ne’ebé iha Timor-Leste, to’o loron 12 fulan-setembru, atu apoia Governu hodi formula estratéjia no polítika sira ba dezenvolvimentu kapitál umanu, liuliu iha kontestu preparasaun rekursus umanus Timor-Leste nian atu adere ba ASEAN iha futuru. 

Bob Aubrey maka fundadór no Prezidente Konsellu Konsultivu Organizasaun Dezenvolvimentu Umanu ASEAN (AHDO) nian. Organizasaun ne’e harii iha tinan 2018, AHDO maka nu’udar organizasaun dahuluk iha ASEAN ne’ebé atu serbí komunidade profisionál sira dezenvolvimentu umanu nian iha ámbitu traballu. AHDO serbisu mós ho empreza no organizasaun sira seluk hodi define propózitu no estratéjia sira dezenvolvimentu umanu nian. AHDO serbisu iha país neen ASEAN nian. 

Durante ninia estadia iha Timor-Leste, Bob Aubrey, aleinde hala’o sorumutuk ho membru Governu balun no responsavel sira seluk hosi entidades públikas, iha ona mós ajenda ba aban, loron 12 fulan-setembru, atu hala’o semináriu ida kona-ba análize no diskusaun ba polítika no estratéjia sira dezenvolvimentu umanu nian aliña ho padraun internasionál no rejionál sira.