Iha loron 28 no 29 fulan-agostu, Timor-Leste simu ona vizita ofisiál ida husi Ministru Negósius Estranjeirus Bangladesh nian, Dr. AK Abdul Momen. Iha vizita dahuluk Ministru Bangladesh ba Timor-Leste ne’e, Momen hala’o ona sorumutuk ho Prezidente Repúblika, ho Primeiru-Ministru no membru Governu timoroan sira seluk ho objetivu atu hametin relasaun diplomátika entre país rua-ne’e. 

Primeiru-Ministru, Kay Rala Xanana Gusmão, durante iha ninia enkontru ho ukun-na’in Bangladesh ne’e, subliña kona-ba susesu notável sosioekonómiku nian sira ne’ebé alkansa ona liuhusi lideransa Primeira-Ministra, Sheikh Hasina Wajed no hato’o ninia agradesimentu ba kontributu husi Bangladesh durante tinan 1999 to’o 2006, bainhira partisipa iha misaun pás husi Organizasaun Nasoins Unidas (ONU) nian, apoiu ba povu no ba nasaun timorense ninia restaurasaun independénsia.

Durante sorumutuk ne’e, Xefe Governu no Ministru AK Abdul Momen manifesta ona sira-nia vontade hodi kolabora iha área oinoin maka hanesan saúde, edukasaun, formasaun, seguransa alimentár no hatán ba mudansa klimátika sira. 

Ministru Negósius Estranjeirus Bangladesh mós hala’o ona sorumutuk bilaterál sira ho Ministru Prezidénsia Konsellu Ministrus no Ministru Negósius Estranjeirus iha ezersísiu, Agio Pereira no ho Ministra Saúde, Elia Antonio de Araújo dos Reis Amaral, hodi diskute kona-ba kooperasaun bilaterál iha área sira interese mútuu nian, hanesan hatán ba alterasaun klimátika, edukasaun, agrikultura, seguransa ai-han, komérsiu bilaterál no área sira seluk.

País rua ne’e kompromete ona hodi hametin sira-nia lasu diplomátiku sira no hodi esplora oportunidade sira kooperasaun iha área oioin, ho objetivu atu promove dezenvolvimentu no povu nia moris di’ak.