Governu Timor-Leste

Prezidénsia Konsellu Ministrus

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 29 fulan-agostu tinan 2023

Konsellu Ministrus hala’o sorumutuk iha Palásiu Governu, Dilli, no aprova ona projetu Dekretu-Lei rua, ne’ebé aprezenta husi Ministra Saúde, Elia A. A. dos Reis Amaral, kona-ba:

• kriasaun Institutu Nasionál Farmásia no Produtu Médiku (FPM). Ne’ebé ninia sede iha Munisípiu Dili no ho ninia jurisdisaun iha territóriu nasionál tomak. FPM, troka Servisu Autónomu Medikamentu no Ekipamentu Saúde, I.P, nu’udár institutu públiku ida-ne’ebé responsavel ba fornesimentu produtu farmaséutiku no ekipamentu médiku sira Servisu Nasionál Saúde nian. Ba ida-ne’e, FPM bele hetan produtu farmaséutika no ekipamentu médiku sira, hanesan liu husi importasaun, prodús produtu farmaséutika no ekipamentu médiku sira, asegura kontrolu kualidade ba sasán sira ne’ebé hetan ona ka prodús husi institutu no asegura prátika di’ak armazenamentu no distribuisaun ba Servisu Nasionál Saúde nian, no fan filafali ba farmaséutika no unidade privada saúde nasionál sira, bainhira presiza.

.....

• aprovasaun ba Rejime Asisténsia Médika iha Rai-li’ur. Objetivu husi diploma ida-ne’e mak atu adapta Rejime Asisténsia Médika iha Rai-li’ur ba realidade atuál país nian, nune’e mós prátika vijente/atuál sira.  Tanba ne’e, klarifika no armoniza konseitu sira ho prátika lejizlativa atuál sira, esklarese no redús liña atuasaun husi interveniente oioin iha prosedimentu asisténsia médika iha rai-li’ur, no evita redundánsia no atus la nesesáriu sira hodi asegura asisténsia médika ida-ne’ebé lais no efikás liu.

Diploma ne’e prevee, direitu asisténsia médika iha rai-li’ur ba benefisiáriu sira Servisu Nasionál Saúde nian ne’ebé hela iha Timor-Leste, no mós abranje situasaun sira, iha ne’ebé benefisiáriu temporariamente iha rai-li’ur, uainhira hala’o hela servisu Estadu no presiza asisténsia médika urjente no inkompativel ho demora hodi fila mai Timor-Leste. Konsagra ona katak pasiente ne’e bele benefisia de’it asisténsia médika iha rai-li’ur karik akompaña husi médiku iha/husi Servisu Nasionál Saúde nian, no la posivel atu halo proposta asisténsia médika iha rai-li’ur ne’ebé mai husi instituisaun ne’ebé la integra iha Servisu Nasionál Saúde.

…..

Konsellu Ministrus delibera ona hodi aprova kalendáriu preparasaun Orsamentu Jerál Estadu ba tinan 2024, ne’ebé aprezenta husi Ministra Finansas Santina José Rodrigues F. Viegas Cardoso.

Tuir kalendáriu ne’ebé aprova ona, to’o loron 7 fulan-setembru sei identifika no define atividade anuál no plurianuál. Semináriu Jornada Orsamentál ne’e sei hala’o iha loron 8 fulan-setembru no iha loron 13 fulan-setembru, Konsellu Ministrus sei aprova tetu orsamentál. Liña ministeriál sira tenke finaliza sira-nia proposta orsamentál to’o loron 29 fulan-setembru hodibele analiza husi Komité Revizaun Orsamentál hahú husi loron 20 fulan-outubru. Hafoin ajustamentu nesesáriu ba proposta setoriál sira, prevee katak projetu Proposta Lei Orsamentu Jerál Estadu tinan 2024 ne’e sei aprova iha Konsellu Ministrus iha loron 31 fulan-outubru no sei entrega ba Parlamentu Nasionál iha loron 15 fulan-novembru

…..

Konsellu Ministrus mós aprova ona projetu Dekretu-Lei, ne’ebé aprezenta husi Ministra Dulce de Jesus Soares, ne’ebé aprova Orgánika Ministériu Edukasaun nian.

Ministériu Edukasaun maka departamentu governamentál ne’ebé responsavel ba konsesaun, ezekusaun koordenasaun no avaliasaun ba polítika ne’ebé define no aprova ona husi Konsellu Ministrus, iha área ensinu no kualifikasaun ba nivel ensinu hotu-hotu, la inklui nivel superior, no konsolida no promove lian ofisiál sira.

…..

Ministra Edukasaun mós aprezenta projetu Rezolusaun Governu ba prorrogasaun mandatu Komité Orientadór 25 nian ne’ebé hetan ona aprovasaun.

Konsidera katak atu fó kontinuidade ba mandatu Komité Orientadór, no atu bele konklui traballu peskiza, análize no elabora Livru Istória Rezisténsia Juveníl no Estudantes Timor-Leste nian, Governu deside hodi prorroga mandatu Komité Orientadór 25 nian ba tinan lima tan. Despeza no enkargu sira ne’ebé mosu husi prosekusaun atribuisaun sira Komité Orientadór 25 nian sujeita ba rejime ne’ebé aplikavel ba konsesaun subvensaun públikas, ne’ebé bele distribui ba verba sira ne’ebé tau ona iha orsamentu anuál Ministériu Edukasaun nian. Rezolusaun Governu nian ida ne’e prodús efeitu sira, retroativamente, hahú husi loron 9 fulan-janeiru tinan 2022.

…..

Konsellu Ministrus aprova projetu Dekretu-Lei, ne’ebé aprezenta husi Ministru José Honório da Costa Pereira Jerónimo, ne’ebé aprova orgánika Ministériu Ensinu Superiór, Siénsia no Kultura nian.

Ministériu Ensinu Superiór, Siénsia no Kultura maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika, define no aprova ona husi Konsellu Ministrus, ba área ensinu no kualifikasaun nível superiór nian, nune’e mós ba área siénsia no teknolojia nian.

…..

Konsellu Ministru mós aprova projetu Dekretu-Lei, ne’ebé aprezenta husi Ministru Miguel Marques Gonçalves Manetelu, ne’ebé aprova orgánika Ministériu Transportes no Komunikasoins.

Ministériu Transportes no Komunikasoins maka departamentu governamentál ne’ebé responsavel ba konsesaun, ezekusaun no koordenasaun no avalisaun ba polítika ne’ebé define no aprova ona husi Konsellu Ministrus ba área transportes no Komunikasoins.

…..

Konsellu Ministrus aprova projetu Dekretu-Lei, ne’ebé aprezenta husi Ministru Filipus nino Pereira, ne’ebé aprova orgánika Ministériu Komérsiu no Indústria nian.

Ministériu Komérsiu no Indústria maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika sira ne’ebé define ona husi Konsellu Ministrus ba área atividade ekonómika, komersiál no industriál .

…..

Konsellu Ministru mós aprova projetu Dekretu-Lei, ne’ebé aprezenta husi Vise-Primeiru-Ministru Mariano Assanami Sabino, ne’ebé aprova orgánika Ministériu Dezenvolvimentu Rurál no Abitasaun Komunitária nian.

Ministériu Dezenvolvimentu Rurál no Abitasaun Komunitária maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika sira ne’ebé define no aprova ona husi Konsellu Ministrus ba área sira ne’ebé iha ligasaun ho melloria kondisaun moris, oportunidade no asesu ba zona rurál sira, dezenvolve inisiativa hodi promove diversifikasaun atividades, kriasaun empregu iha fatin rurál, ho objetivu atu konsolida ninia estrutura produtiva.

…..

Konsellu Ministrus aprova projetu Dekretu-Lei, ne’ebé aprezenta husi Ministru Francisco da Costa Guterres, ne’ebé aprova orgánika Ministériu Interiór nian.

Ministériu Interiór maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika sira ne’ebé define no aprova ona husi Konsellu Ministrus, iha área seguransa interna, migrasaun no azilu, kontrolu fronteiras, protesaun sivíl, seguransa rodoviária no kooperasaun polisiál.

…..

Konsellu Ministrus aprova projetu Dekretu-Lei, ne’ebé aprezenta husi Ministru Nelyo Isaac Sarmento, ne’ebé aprova orgánika Ministériu Juventude, Desportu, Arte no Kultura nian.

Ministériu Juventude, Desportu, Arte no Kultura maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika, ne’ebé define no aprova ona husi Konsellu Ministrus, iha área juventude, desportu, arte no kultura nian.

…..

Konsellu Ministru aprova projetu Dekretu-Lei, ne’ebé aprezenta husi Ministru Gastão Francisco de Sousa, ne’ebé aprova orgánika Ministériu Planeamentu no Investimentu Estratéjiku nian.

Ministériu Planeamentu no Investimentu Estratéjiku maka departamentu governamentál ne’ebé responsavel ba konsesaun, koordenasaun no avaliasaun ba polítika, ne’ebé define no aprova ona husi Konsellu Ministrus, ba área promosaun dezenvolvimentu ekonómiku no sosiál país nian, liuhusi planeamentu estratéjiku no integradu no rasionalizasaun rekursus finanseirus ne’ebé disponivel, hodi asume responsabilidade espesífika sira kona-ba implementasaun Planu Estratéjiku Dezenvolvimentu nian.

....

Ikusliu, Konsellu Ministrus aprova projetu Dekretu-Lei ne’ebé aprezenta hosi Ministra  Santina José Rodrigues F. Viegas Cardoso, ne’ebé aprova orgánika Ministériu Finansas nian.

Ministériu Finansas nu’udar departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika, ne’ebé Konsellu Ministrus define no aprova ona, ba área planeamentu, monitorizasaun no avaliasaun anuál, Orsamentu Jerál Estadu no finansas públikas nian. REMATA

REMATA