Sekretáriu Estadu Kooperativas, Arsénio Pereira da Silva, reprezenta Vise-Primeiru-Ministru, Ministru Asuntus Ekonómikus no Ministru Turizmu no Ambiente, Francisco Kalbuady Lay, partisipa iha Sesaun Ministeriál Altu-Nivel Simeira Negósius Inkluzivus ASEAN nian ba da-6, ne’ebé hala’o iha Bali, Indonézia, hosi loron 23 to’o 25 fulan-agostu tinan 2023.

Eventu ne’e organiza husi Governu Repúblika Indonézia nian,serbisu hamutuk ho Sekretariadu ASEAN, Komisaun Ekonómika no Sosiál Nasoins Unidas nian ba Ázia no Pasífiku (UN-ESCAP) no Organizasaun ba Kooperasaun no Dezenvolvimentu Ekonómiku (OCDE – sigla iha lian portugés), no hetan partisipasaun husi Estadus-Membrus hotu ASEAN nian. 

Eventu ne’e foka liu ba atividade prinsipál tolu, hanesan Sorumutuk Ministeriál Altu-Nivel hodi superviziona dezenvolvimentu PMEs, ekonomia no investimentu, diálogu entre múltiplu interveniente hodi promove prátika negósius inkluzivus, korrespondénsia entre negósius PMEs no finansiamentu, no mós mostra no vizita ida ba negósius inkluzivus iha Bali, Indonézia.

Iha ninia diskursu, Sekretáriu Estadu Kooperativas, deklara kompromisu Timor-Leste nian atu “apoia inisiativa negósius inkluzivus ASEAN”, no subliña nesesidade “Timor-Leste hodi hahú prosesu inisiál atu aliña no dezenvolve instrumentu polítiku ida ne’ebé ajuda no garante katak negósius inkluzivus bele hetan apoiu iha nivel nasionál no bele promove ninia integrasaun iha nivel rejionál”.