Sekretáriu Estadu Formasaun Profisionál no Empregu (SEFOPE), Rogério Araújo Mendonça, hasoru-malu ho Koordenadora Rezidente Nasoins Unidas nian iha Timor-Leste, Funmi Balogun, hodi diskute kooperasaun ho ajénsia oin-oin Nasoins Unidas nian iha ámbitu empregu no formasaun profisionál. Sorumutuk ne’e hala’o iha instalasaun Sekretaria Estadu ida-ne’e nian, iha loron 21 fulan-agostu tinan 2023. 

Iha sorumutuk ne’e, reprezentante Nasoins Unidas no Sekretáriu Estadu ko’alia kona-ba planu Governu nian iha área empregu no formasaun profisionál no mós kona-ba posibilidade hodi serbisu hamutuk ho ajénsia oin-oin Nasoins Unidas nian.

Sekretáriu Estadu fahe ba Fummi Balogun kona-ba prioridade prinsipál setór ne’e nian, no ko’alia liu ba planu kapasitasaun ba joven sira, ne’ebé foka liuliu iha hanorin lian ingleza no koreana, atu prepara sira ba oportunidade serbisu sazonál no empregu iha rai-li’ur. Sekretaria Estadu ne’e hakarak estabelese sentru formasaun iha munisípiu sira hodi hasa’e nivel kompeténsia traballadór timoroan sira nian, husikedas nivel la kualifikadu to’o ba abilidade nivel médiu.

Tema importante seluk ne’ebé diskute iha sorumutuk ne’e maka promove negósiu ki’ik, hanesan restaurante no karpintaria, nu’udar forma ida atu kria empregu no responde ba dezempregu iha país ne’e.