Sensu 2010 ne’ebé mak hahú iha loron 11 fulan Jullu oin mai to’o loron 25 fulan Jullu, ne’e Diresaun Nasionál Estatístika (DNE) nian, ne’ebé pertense ba Ministetiru Finansas mak hala’o. Dadu sira rekolla hosi populasaun ne sei rai iha DNE, trata hanesan, dadu hirak Lei Sensu nian konsidera hanesan konfidensiál, ka bele dehan, “ami sei la fó-sai dadu hirak espesifiku, individuál, ba nem ema ida. Oras ne’e, rezultadu hosi sensu, katak, análize ne’ebé mak halo ita bele dehan: iha Timór hetan númeru determinadu populasaun nian, la’os de’it feto, maibé mós mane, la’os de’it labarik, maibé mós ema estranjeiru, mundu tomak sei hatene kona-ba ida ne’e. Ami sei la fó-sai see mak ida ne’e no see mak ida ne’ebá, ami sei la fó-sai ema nia naran, ami sei la fó-sai ida ne’e, ami sei fó-sai de’it mak dadu hirak jerál nian. Nune’e mós akontese ho buat hirak seluk: ita sei hatudu balada hirak iha Timor-Leste, uma, kareta, tratór sira, no sira nia kondisaun oinsá, tuir dadu hirak sira fó mai ami. Ami sei la identifika ema see mak hato’o dadu ne’e, katak konfidensiál teb-tebes”, Ministra Finansas, Emília Pires, garante buat ida-ne’e.

Hein katak sidadaun hotu-hotu bele kontribui ba sensu 2010 ne’e, hodi partisipa, ka bele dehan hodi hatán ba inkéritu.

“Ida ne’e, tuir loloos hanesan devér ida. Labele sai fali buat ida hanesan atu hili nian basá la’e karik, tebes duni, ema sei halo sabotajen ba sensu” esplika Ministra Finansas, hodi hatutan tan katak “sensu ne’e atu halo di’ak mai ita hotu, tanba ne’e mak sidadaun ida tenki partisipa hodi preenxe kestionáriu hirak ne’e. Ema hirak ne’ebé mak bele no hatene preenxe sira tenki preenxe diretamente. Ema hirak ne’ebé mak hetan difikuldade sei tulun hosi ema entrevistadór sira ne’ebé hamutuk na’in rihun rua atus neen ne’ebé mak ami oras ne’e fó hela servisu ba sira”.

Ba informasaun seluk tan bele rona entrevista ho Ministra Finansas iha programa “Adeus Konflitu, Bem-vindu Dezenvolvimentu”, iha Rádiu Timor-Leste, iha frekuénsia 91.7 – iha Lian Portugés, Sábadu, Loron 10 Jullu, tuku 19:30.