Sekretária Estadu Igualdade (SEI), Elvina Sousa Carvalho, akompaña Prezidente Repúblika, José Ramos-Horta, iha inaugurasaun ba loja Asosiasaun Soru-Na’in Timor-Leste, “Rede Soru Na’in”, iha loron 15 fulan-agostu tinan 2023, iha kompleksu Dili Square.

Iha inaugurasaun ba loja ida-ne’e nu’udar rezultadu husi parseira entre Feto ONU, Timor Aid no Fundasaun Alola, ho objetivu atu prezerva no proteje “tais” hanesan identidade kulturál orijinál Timor-Leste nian. 

Produtu sira ne’e prodús husi grupu soru-na’in sira husi munisípiu oioin país nian, ne’ebé hola-parte iha asosiasaun “Rede Soru Na’in”.

“Tais” ne’e hetan rekoñesimentu husi UNESCO hanesan Patrimóniu Imateriál Umanidade iha loron 14 fulan-dezembru tinan 2021, no tinan-tinan selebra iha data ne’e hanesan Loron Nasionál Tais nian.

Durante inaugurasaun ne’e, Elvina Sousa Carvalho, “lori Sekretaria Estadu Igualdade nia naran”, felisita “Asosiasaun Soru-Na’in, ne’ebé ho apoiu husi Feto ONU, Timor Aid no Fundasaun Alola, bele konkretiza abertura ba loja ida-ne’e, hodi fa’an produtu ne’ebé prodús ona husi sira-nia grupu”. Sekretaria Estadu hato’o mós ninia agradesimentu ba Feto ONU, Timor Aid no Fundasaun Alola, “ne’ebé iha tinan hirak nia laran servisu maka’as hodi apoia estabelesimentu ba rede soru-na’in ida iha nivel munisipál no nasionál”. 

Prezidente José Ramos Horta espresa ninia apresiasaun kle’an ba “Rede Soru Na’in” tan ninia kompromisu atu prezerva Timor-Leste nia identidade kulturál importante ida, maka “tais” tradisionál.

Eventu ne’e sura mós ho partisipasaun Koordenadora Rezidente Nasoins Unidas nian iha Timor-Leste, Fumni Balogun, Xefe Misaun Feto ONU nian, Amy Nishtha Satyam, Diretora Timor Aid, Céu Lopes no Diretora Fundasaun Alola, Maria Guterres.

Loja “Rede Soru Na’in” nakloke ba públiku, loroloron, hahú husi tuku 9h30 to’o tuku 18h30, iha kompleksu Dili Square.