Aniversáriu FALINTIL nian ba dala 48
Selebrasaun aniversáriu FALINTIL nian ba dala 48, ne’ebé organiza husi Ministériu Defeza, sei hala’o iha loron 19 no loron 20 fulan-agostu, ho tema “Komemora esforsu heroiku husi luta ba konsolidasaun identidade no nasionalismu povu nian”.
Iha loron 19, tuku 08:30, sei iha misa ida hodi fó omenajen ba Erói Nasionál sira iha Auditóriu kuartél-jenerál F-FDTL nian, tuir kedas ho tau ai-funan iha Jardín Eróis sira nian, iha Metinaru.
Iha loron 20, FALINTIL nia loron aniversáriu, serimónia militár iha kuartél-jenerál F-FDTL nian sei hahú iha tuku 8:00.
Hafoin onra militár, no integrasaun Estandarte Nasionál ba Forsa sira iha Parada, sei iha mós omenajen atu hanoin hikas fali Erói Nasionál sira ne’ebé mate iha funu-laran. Molok diskursu sira husi Xefe Estadu-Maiór-Jenerál F-FDTL, Tenente-Jeneral Domingos Raúl “Falur Rate Laek”, no Prezidente Parlamentu Nasionál, Maria Fernanda Lay, sei halo anúnsiu ba promosaun militár sira.
Tuir fali ida-ne’e maka Forsa sira iha Parada sei halo desfile no tuir mai sei han meiudia nian no fahe malu.
