Iha loron 11 fulan-agostu tinan 2023, Programa Nasoins Unidas nian ba Dezenvolvimentu (PNUD) no Governu Japaun asina Akordu Troka Notas ida, ho valór besik dolar amerikanu millaun 6, ho objetivu atu apoia fortalesimentu kapasidade operasionál sira Rádiu-Televizaun Timor-Leste (RTTL) nian no konstrusaun ba ninia edifísiu foun. Serimónia asinatura ne’e hala’o iha instalasaun Nasoins Unidas nian, iha Dili.
Akordu ne’e asina ona entre Embaixadór Japaun iha Timor-Leste, Tetsuya Kimura, no Reprezentante Rezidente interina PNUD, Adeline Carrier, iha prezensa Prezidente Repúblika José Ramos-Horta, Sekretáriu Estadu Komunikasaun Sosiál, Expedito Dias Ximenes, no Koordenadora Rezidente Organizasaun Nasoins Unidas nian iha Timor-Leste, Funmi Balogun.
Nivel husi estragu estruturál ba edifísiu RTTL, EP, ne’ebé kauza husi inundasaun tinan 2021, prejudika ona funsionamentu hosi instituisaun ne’e. Liuhusi akordu ida-ne’e entre UNDP ho Japaun, sei fó apoiu finanseiru no tékniku ba RTTL, inklui apoiu ba konstrusaun edifísiu foun ida, nune’e mós atu hametin ninia kapasidades operasionais. 
Embaixadór Japaun hateten katak “Japaun sei kontribui besik dolar amerikanu millaun 6 hodi harii edifísiu foun ida ba estasaun radiodifuzaun nasionál, ne’ebé sei inklui auditóriu ida, estúdius gravasaun nian no salas ba jornalista sira.” Projetu ne’e inklui mós “formasaun téknika hodi apoia dezenvolvimentu kapasidade téknika sira ekipa RTTL nian.”
Diplomata ne’e mós hatete tan katak “hanesan nasaun ida ne’ebé iha valores demokrasia, Japaun sente orgullu no agradese tanba bele kontribui iha área ida-ne’e,” no hato’o esperansa katak “RTTL bele hadi’a ninia kapasidade operasionál sira liuhusi inisiativa ida-ne’e.”
Adeline Carrier, responsavel UNDP nian, subliña importánsia husi “RTTL hodi atrai no envolve foin-sa’e sira tantu hanesan públiku (haree-na’in no rona-na’in) no mós hanesan autór ba ninia programa sira.”
Sekretáriu Estadu Komunikasaun Sosiál agradese ba apoiu hosi povu japonés ba konstrusaun edifísiu foun RTTL nian no hato’o nia entuziazmu ba kolaborasaun ho PNUD iha implementasaun projetu ne’e.”