Prezidente Repúblika, José Ramos-Horta, no Primeiru-Ministru, Kay Rala Xanana Gusmão, partisipa iha eventu komemorasaun Loron Asosiasaun Nasoins Sudeste Aziátiku (ASEAN) ba da-56, ne’ebé realiza iha Embaixada Filipina iha Dili, iha loron 11 fulan-agostu tinan 2023. 

Serimónia ne’e, organiza husi embaixada sira husi país ASEAN iha Dili, konta ho prezensa husi Vise-Primeiru-Ministru, Francisco Kalbuady Lay, Ministru Negósius Estranjeirus no Kooperasaun, Bendito dos Santos Freitas, Vise-Ministra Asuntus ASEAN, Milena Rangel no reprezentante sira korpu diplomátiku nian.

ASEAN harii iha loron 8 fulan-agostu tinan 1967 iha Bankoke, Tailándia, liuhusi deklarasaun ne’ebé asina husi país fundadór lima: Indonézia, Malázia, Filipina, Singapura no Tailándia. Hahú husi ne’ebá, Brunei Darussalam (1984), Laos e Myanmar (1997) no Kamboja (1999) mós tama ba ASEAN. Timor-Leste, daudaun ne’e hanesan país observadór, hakarak tebes sai membru plenu direitu.

Primeiru-Ministru, Kay Rala Xanana Gusmão, espresa ninia laran-ksolok ba partisipasaun iha selebrasaun ida-ne’e, hodi subliña importánsia ASEAN iha konstrusaun relasoins ne’ebé metin no kooperasaun ida ne’ebé estavel ba futuru. Prezidente Repúblika, José Ramos-Horta, destaka katak, “Timor-Leste prontu atu sai membru ASEAN”. 

Primeiru-Ministru, iha ninia mensajen felisitasoins ba ASEAN, “durante tinan 56 halo promosaun ba estabilidade, unidade no pás iha rejiaun ne’e”, nia foka ba papél ASEAN nian iha “promosaun dezenvolvimentu no prosperidade ba benefísiu iha rejiaun no ba ninia povu sira”, hodi afirma katak, “Sudeste Aziátiku daudaun ne’e hanesan poténsia ekonómika ida ne’ebé dinámika hodi hasoru futuru ho otimizmu ne’ebé boot tebes”.