Governu Timor-Leste

Prezidénsia Konsellu Ministrus

IX Governu Konstitusionál

...........................................................................................................................

Komunikadu Imprensa

Sorumutuk Estraordináriu Konsellu Ministrus nian iha loron 10 fulan-agostu tinan 2023

Konsellu Ministrus hala’o sorumutuk iha Palásiu Governu Dili, tuir proposta sira ne’ebé aprezenta husi Ministru Defeza Donaciano do Rosário da Costa Gomes, delibera ona, atu haruka ba Sua Exelénsia Prezidente Repúblika hodi hetan aprovasaun:

• Proposta nomeasaun, hodi haruka ba Sua Exelénsia Prezidente Repúblika, Coronel Domingos Soares “Dobu”, nu’udar Komandante Komponente Terrestre F-FDTL; no

• Propostas promosaun:
  • Brigadeiru-Jenerál Américo Ximenes “Sabika Besi Kulit” ba postu Majór-Jenerál;

• Brigadeiru-Jenerál Cornélio Ximenes “Maunana” ba postu Majór-Jenerál;

• Brigadeiru-Jenerál João Miranda “Aluk Descartes” ba postu Majór-Jenerál;

• Koronél José da Costa Soares “Trix” ba postu Brigadeiru-Jenerál; no

• Kapitaun Mar e Guerra Higino das Neves ba postu Komodoru.

….

Konsellu Ministrus aprova projetu Dekretu-Lei, ne’ebé aprezenta husi Ministru prezidénsia Konsellu Ministrus, Agio Pereira, kona-ba Pagamentu Suplementár ba funsionárius, ajentes no kontratadus ho termu sertu iha Imprensa Nasionál Timor-Leste, IP (INTL), ne’ebé halo serbisu impresaun boletins votu ba eleisaun parlamentares tinan 2023, ne’ebé hala’o iha loron 21 fulan-maiu liubá.

Pagamentu suplementár ida-ne’e ho objetivu atu fó prémiu ba traballadór sira ne’ebé serbisu durante prosesu impresaun boletins votu, no fó kompensasaun ba sira ho kondisaun espesiál tanba limita sira-nia liberdade pesoál ho serbisu todan tebetebes ne’ebé sira hasoru.

Iha direitu ba pagamentu suplementár ne’e maka funsionárius, ajentes no kontratadus INTL nian de’it, ne’ebé serbisu durante prosesu impresaun boletins votu no iha rejime serbisu permanente, tuir turnu, durante oras 24 loroloron, laiha interrupsaun, durante períodu durasaun ba serbisu ne’e.

….

Konsellu Ministrus aprova ona projetu Dekretu-Lei ne’ebé aprezenta husi Ministru Tomás Rosário Cabral, ne’ebé aprova Orgánika Ministériu Administrasaun Estatál nian.

Ministériu Administrasaun Estatál maka departamentu governamentál ne’ebé responsavel ba konsesaun ezekusaun, koordenasaun no avaliasaun polítika, ne’ebé define no aprova ona husi Konsellu Ministrus, ba área Podér Lokál, desentralizasaun administrativa, apoiu ba organizasaun komunitárias, promosaun dezenvolvimentu lokál, organizasaun no ezekusaun ba prosesu eleitorál no referendárius, promosaun ijiene, organizasaun urbana, klasifikasaun no konservasaun dokumentus ofisiál ho valór istóriku.

…..

Konsellu Ministrus mós aprova ona projetu Dekretu Governu nian, ne’ebé aprezenta mós husi Ministru Administrasaun Estatál, ne’ebé fó-sai data ba realizasaun Asembleias Aldeia no ba Konsellu Suku iha ámbitu prosedimentu ba eleisaun lider komunitáriu sira.

Konsellu Suku ne’e kompostu husi Xefe Suku, Delegadu no Delegada Aldeia, Xefe Aldeia sira, Lia-na’in no reprezentante juventude Suku nian, sira ne’e hotu eleitu ba mandatu tinan hitu. Hafoin aktus eleitorál sira ne’ebé realiza ona iha fulan-outubru no novembru tinan 2016 ne’ebé hili ona lider komunitáriu atuál sira, agora hahú prosesu eleisaun ba membru órgaun Suku sira, ne’ebé sei asume responsabilidade durante períodu tinan 2023 to’o 2030.

Iha loron 13 fulan-outubru tinan 2023, Konsellu Suku sira sei hasoru malu hodi estabelese meza eleitorál Suku no hodi simu kandidatura Xefe Suku sira. Iha loron 28 fulan-outubru tinan 2023, Asembleia Aldeia sira sei hasoru malu hodi realiza eleisaun Delegada Aldeia ba Konsellu Suku, Delegadu Aldeia ba Konsellu Suku no Xefe Aldeia no Xefe Suku.  Karik laiha kandidatu Xefe Suku sira ida hetan liu metade hosi votus válidu ne’ebé hasai, Asembleia Aldeia sira hasoru malu, hodi realiza votasaun daruak iha loron 13 fulan-novembru tinan 2023.

Konsellu Suku sira hasoru malu iha loron 8 fulan-novembru tinan 2023, hodi hili Lian-na’in no reprezentante Juventude ho asentu iha Konsellu Suku nian. Iha Suku sira ne’ebé hala’o votasaun daruak hodi hili sira-nia Xefe Suku, Konsellu Suku nian sei hasoru malu iha loron 23 fulan-novembru tinan 2023 hodi hili Lian-na’in no reprezentante Juventude ho asentu iha Konsellu Suku.

Kalendáriu ida ne’e sei la aplika ba Suku sira ne’ebé mandatu husi sira-nia lider komunitáriu nian sei termina iha fulan-abríl tinan 2024

….

Konsellu Ministrus aprova projetu Dekretu-Lei, ne’ebé aprezenta husi Gil da Costa Monteiro “Oan Soru”, ne’ebé aprova Orgánika Ministériu Asuntus Kombatentes Libertasaun Nasionál.

Ministériu Asuntus Kombatentes Libertasaun Nasionál maka departamentu governamentál ne’ebé responsavel ba konsesaun, ezekusaun, koordenasaun no avaliasaun polítika, ne’ebé define no aprova ona husi Konsellu Ministrus, ba asuntus antigu Kombatentes Libertasaun Nasionál.

….

Konsellu Ministrus aprova projetu Dekretu-Lei, ne’ebé aprezenta husi Ministru Donaciano do Rosário Gomes, ne’ebé aprova Orgánika Ministériu Defeza.

Ministériu Defeza maka departamentu governamentál ne’ebé responsavel ba konsesaun, ezekusaun, koordenasaun, avaliasaun polítika, ne’ebé define no aprova ona husi Konsellu Ministrus, ba área defeza nasionál no kooperasaun militár. REMATA