Primeiru-Ministru, Kay Rala Xanana Gusmão, haruka mensajen felisitasaun/parabéns ba Asosiasaun Nasoins Sudeste Aziátiku (ASEAN) ba ninia aniversáriu da-56. Organizasaun ne’e harii iha loron 8 fulan-agostu tinan 1967, sai ona hanesan forsa prinsipál ida hodi promove estabilidade, unidade no pás iha rejiaun, no dezempeña papél vitál ida iha senáriu internasionál.

Iha ninia mensajen, Xefe Governu afirma katak “ASEAN promove ona dezenvolvimentu no prosperidade hodi fó benefísiu ba rejiaun no ninia povu sira”, no permite katak Sudeste Aziátiku daudaun ne’e hanesan “poténsia ekonómika dinámika ida no hateke ba futuru ho otimizmu tebetebes.

Primeiru-Ministru hateten katak “liu tiha tinan 24 luta ba independénsia no tinan 21 seluk hasoru luta foun, agora harii ami-nia Estadu Demokrátiku no hanesan baze ba nasaun ida ne’ebé dezenvolvidu no sustentavel, Repúblika Demokrátika Timor-Leste kontinua buka hatene prinsípiu sira ne’ebé orienta ASEAN iha transformasaun Sudeste Aziátiku hanesan komunidade nasaun ida, ne’ebé iha konfiansa, amizade no kooperasaun sai hanesan valores ne’ebé halibur hamutuk nasaun oioin.

Na’i-ulun ne’e mós hato’o ninia konfiansa katak “hamutuk ita bele hasoru dezafiu sira ne’ebé iha ita-nia oin, no aproveita oportunidade boot sira ne’ebé rejiaun ne’e oferese ba ita hotu.” no dezeja “susesu tomak iha konstrusaun ASEAN ida ne’ebé forte liután, ho respeitu ba Direitus Umanus no Liberdades Demokrátikas”.