Mensajen husi Primeiru-Ministru Timor-Leste nian iha okaziaun Aniversáriu ASEAN nian ba da-56
Primeiru-Ministru
IX Governu Konstitusionál
...........................................................................................................................
Komunikadu Imprensa
Mensajen husi Primeiru-Ministru Timor-Leste nian iha okaziaun Aniversáriu ASEAN nian ba da-56
Husi Timor-Leste, ha’u hato’o ami-nia parabéns ba ASEAN, tanba iha tinan 56 laran promove, estabilidade, unidade no pás iha rejiaun ne’e.
ASEAN promove ona dezenvolvimentu no prosperidade ba benefísiu rejiaun ne’e nian no nia povu sira hotu.
No abranje diversidade kulturál, istóriku no relijioza, ASEAN harii ona komunidade ida ne’ebé nakonu ho respeitu no toleránsia.
Sudeste Aziátiku ohin-loron, sai hanesan poténsia ekonómika ho dinámika ida ne’ebé hateke ba futuru ho otimizmu tebetebes.
Liu tiha tinan 24 luta ba independénsia no tinan 21 seluk hasoru luta foun, agora harii ami-nia Estadu Demokrátiku no hanesan baze ba nasaun ida ne’ebé dezenvolvidu no sustentavel, Repúblika Demokrátika Timor-Leste kontinua buka hatene prinsípiu sira ne’ebé orienta ASEAN iha transformasaun Sudeste Aziátiku hanesan komunidade nasaun ida, ne’ebé iha konfiansa, amizade no kooperasaun sai hanesan valores ne’ebé halibur hamutuk nasaun oioin.
Tanba ne’e maka Timor-Leste hanesan Membru Fundadór Organizasaun Intergovernamentál ida ne’ebé hanaran “g7+”, ne’ebé ho estatutu hanesan Observadór Permanente iha Organizasaun Nasoins Unidas (ONU), ne’ebé luta ba pás no ba dezenvolvimentu, maibé liuliu ba Konstrusaun Estadu Demokrátiku sira ne’ebé respeita Direitus Humanus no Demokrasia
Ne’e mak objetivu prinsipál, ne’ebé hamutuk ho Estadus Membrus19, Timor-Leste buka atu atinje no felizmente, ami prova ona ba mundu katak Timor-Leste iha ona dalan ne’ebé loos, hanesan bele haree liuhusi ami-nia partisipasaun pasifika no demokrátika iha ami-nia eleisaun Prezidensiál ho Parlamentar foin daudaun ne’e.
Ha’u hatene katak, hamutuk ita bele hasoru dezafiu sira ne’ebé iha ita-nia oin, no aproveita oportunidade boot sira ne’ebé rejiaun ne’e oferese ba ita hotu.
Dala ida tan, permite ha’u hato’o parabéns ba ASEAN no dejeza susesu tomak iha konstrusaun ASEAN ida ne’ebé forte liután, ho respeitu ba Direitus Umanus no Liberdades Demokrátika. REMATA
