Primeiru-Ministru Timor-Leste, Kay Rala Xanana Gusmão, iha loron 7 fulan-agostu tinan 2023, iha Palásiu Governu, Dili, simu Diretór-Jerál Intelijénsia Nasionál Austrália nian, Andrew Shearer, no Diretora-Jerál Servisus Sekretus Intelijénsia Austrália, Kerri Hartland.

Durante sorumutuk ne’e, Primeiru-Ministru no responsavel sira Servisus Intelijénsia Australiana nian diskute asuntu oioin kona-ba seguransa, no abranje kestaun barak iha ámbitu nasionál nomós rejionál. Sorumutuk ne’e foka liu ba kooperasaun bilaterál kona-ba intelijénsia no seguransa, ne’ebé ho objetivu atu reforsa kapasidade institusionál sira iha Timor-Leste.

Primeiru-Ministru ko’alia liu importánsia hodi mantéin kolaborasaun ida ne’ebé metin ho Austrália hodi hasoru dezafiu komún sira iha área seguransa rejionál no hato’o ninia gratidaun ba apoiu australianu hodi reforsa kapasidade institusionál seguransa no intelijénsia nian.