Iha loron 3 fulan-agostu tinan 2023, iha Palásiu Governu, reprezentante sira husi grupu Stratacom Global, ne’ebé akompaña husi Embaixadór Timor-Leste iha Brunei Darussalam, Abel Guterres, halo aprezentasaun ida ba Ministru Prezidénsia Konsellu Ministrus, Agio Pereira, kona-ba projetu investimentu no dezenvolvimentu multisetoriál abranjente ida iha munisípiu Baukau no Dili. 

Empreza ne’e ho sede iha Brunei Darussalam aprezenta ona projetu ambisiozu ida ne’ebé ho objetivu atu hasa’e kreximentu ekonómiku no sosiál iha munisípiu Baukau no Dili, nune’e mós iha munisípiu sira ne’ebé besik, ho konstrusaun kompleksu turístiku balu, parke industriál, instalasaun ba produsaun enerjia renováveis no infraestrutura sira seluk.

Proposta ne’e inklui konstrusaun kompleksu turístiku modernu hodi renova setór turizmu nasionál. Atubele hasa’e ekonomia lokál, projetu ne’e prevee atu harii parke industriál hodi atrai empreza no estimula produsaun no kria empregu iha país. Ida ne’e mós inklui investimentu iha produsaun enerjia renovável sira no estrasaun minerais. Projetu ne’e prevee konstrusaun ba infraestrutura esensiál seluk no oferese abordajen ida ne’ebé integra ba dezenvolvimentu, hodi garante katak áreas destinadas ba setores-xave, hanesan indústria, turizmu, komérsiu, servisu saúde no abitasaun.

Ministru Agio Pereira hato’o entuziazmu no interesse ba projetu ne’ebé aprezenta, hodi hateten katak, Governu iha kompromisu atu promove investimentu estratéjiku sira ne’ebé dudu progresu Timor-Leste no fó benefísiu direta ba populasaun. Na’i ulun ne’e mós ko’alia kona-ba nesesidade atu halo estudu abranjente hodi avalia impaktu sosiál, ekonómiku no polítiku hotu, hodi garante viabilidade projetu ne’e nian.

Durante vizita ida ne’e mai Timor-Leste, reprezentante sira husi grupu Stratacom Global sei halo mós sorumutuk ho governante sira seluk hodi aprezenta no diskute planu investimentu nian.