Durante konversa telefónika ida ne’ebé hala’o iha dadeer, iha loron 2 fulan-agostu tinan 2023, Primeiru-Ministru Austrália, Anthony Albanese, hato’o ninia felisitasaun no dezeja susesu ba Primeiru-Ministru, Kay Rala Xanana Gusmão, ba pose ne’ebé foin lalais simu nu’udar xefe Governu Konstitusioná IX Timor-Leste nian.

Primeiru-Ministru australianu ne’e elojia “ambiente pás no demokrasia ne’ebé hala’o eleisaun parlamentár tinan ida-ne’e, iha ne’ebé povu fó ninia konfiansa iha formasaun Governu IX nian.

Anthony Albanese manifesta katak iha “esperansa boot ba kolaborasaun entre Governu australianu no Governu IX, ne’ebé lidera husi Primeiru-Ministru, Kay Rala Xanana Gusmão.

Lider Governu rua ne’e, konsidera momentu ida-ne’e hanesan “kapítulu foun ida ba relasoins entre país rua ne’e” no hatudu “ vontade atu serbisu hamutuk”.

Iha konversa amigável ida-ne’e, Primeiru-Ministru Austrália konvida Primeiru-Ministru Xanana atu halo vizita ida ba Austrália iha tinan oin hodi diskuti no hametin kooperasaun bilaterál entre nasaun rua ne’e. Iha tempu hanesan, Xanana Gusmão mós konvida Xefe Governu Austrália ne’e hodi vizita Timor-Leste. 

Iha semana dahuluk Governu Konstitusionál IX nian, Primeiru-Ministru Xanana simu vizita husi Ministra Negósiu Estranjeiru Austrália, Penny Wong, hodi hametin lasus amizade no kooperasaun entre país rua ne’e.