Iha sesta-feira, loron 28 fulan-jullu, Ministru Prezidénsia Konsellu Ministrus, Agio Pereira, hala’o sorumutuk rua iha Palásiu Governu, Dili, reuniaun dahuluk ho Embaixadór Uniaun Europeia iha Timor-Leste, Marc Friedrich, no reuniaun daruak ho reprezentante Banku Mundiál iha Timor-Leste, Bernard Harborne. 

Durante sorumutuk rua ne’e, Ministru Agio Pereira aprezenta prioridade prinsipál sira Programa Governu Konstitusionál IX nian, liuliu kona-ba dezenvolvimentu ekonómiku, setór petrolíferu, infraestruturas, formasaun rekursus umanus, desentralizasaun no kriasaun empregu, liuhusi hametin setór privadu nasionál no atrai investimentu estranjeiru, nune’e mós adezaun Timor-Leste ba Asosiasaun Nasoins Sudeste Aziátiku (ASEAN).

Reprezentante sira husi Uniaun Europeia no Banku Mundiál iha Timor-Leste hato’o felisitasaun ba Ministru ba ninia nomeasaun foin daudauk ne’e hanesan Ministru Prezidénsia Konsellu Ministrus no hatudu vontade atu apoia Governu Konstitusionál IX hodi konkretiza ninia prioridade sira no atu kontinua hametin relasoins bilaterais durante mandatu.