Hafoin Governu Konstitusionál IX hahú ninia funsaun iha loron 1 fulan-jullu tinan 2023, ho apresiasaun unánime pozitiva ba Programa iha Parlamentu Nasionál iha loron 19 fulan-jullu no promulgasaun ba ninia Orgánika husi Prezidente Repúblika iha loron 28 fulan-jullu liubá, Governu, liuhusi Komité Revizaun Orsamentál (KRO) finaliza hela preparasaun ba alterasaun dahuluk ba Lei n. 15/2022, loron 21 fulan-dezembru, kona-ba Orsamentu Jerál Estadu ba tinan 2023. 

Durante loron tolu, husi sesta to’o domingu, iha Auditóriu Ministériu Finansas, Dili, Komité Revizaun Orsamentál, ne’ebé prezide husi Primeiru-Ministru, Kay Rala Xanana Gusmão, hala’o sorumutuk individuál ho Ministériu no Sekretáriu Estadu, instituisaun no organizmu estatál sira hotu hodi identifika prioridade orsamentál husi kargu ida-ida no avalia nesesidade finansiamentu espesífiku hodi viabiliza prioridade governamentál sira ba semestre daruak tinan 2023 nian.

Konsulta ho liña ministeriál sira hetan mós partisipasaun husi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay no Vise-Primeiru-Ministru no Ministru Koordenadór Asuntus Sosiais, Mariano Assanami Sabino, Ministra Finansas, Santina José Rodrigues Ferreira Viegas Cardoso, Ministru Obras Públikas, Samuel Marçal, Ministru Planeamentu no Investimentu Estratéjiku, Gastão Francisco de Sousa no Vise-Ministru Finansas, Helder Lopes.

Projetu Proposta Lei Orsamentu Retifikativu daudaun ne’e sei finaliza husi Ministériu Finansas, no prevee ninia aprovasaun husi Konsellu Ministrus iha sorumutuk tuirmai iha loron 9 fulan-agostu, hodi bele submete ba Parlamentu Nasionál iha loron tuirmai.