Ministru Prezidénsia Konsellu Ministrus, Agio Pereira, iha loron 26 fulan-jullu tinan 2023, iha Palásiu Governu, simu ekipa ida husi Banku Dezenvolvimentu Aziátiku (ADB, sigla iha lian inglés) ne’ebé lidera husi Diretora ADB iha Timor-Leste, Stefania Dina,

Iha sorumutuk dahuluk husikedas hahú ninia funsaun nu’udar Diretora ADB nian iha Timor-Leste no simu pose Governu Konstitusionál IX, ekipa ADB tranzmite ba Ministru kona-ba projetu sira ne’ebé daudaun ne’e la’o hela iha Timor-Leste no foka liu kompromisu Banku Dezenvolvimentu Aziátiku atu serbisu hamutuk ho Governu. 

Ministru Agio aprezenta prioridade prinsipál sira Governu Konstitusionál IX nian, liuliu kona-ba dezenvolvimentu ekonómiku, setór petrolíferu, infraestruturas, formasaun rekursus umanus, desentralizasaun no kriasaun empregu, liuhusi hametin setór privadu nasionál no atrai investimentu estranjeiru no mós adezaun Timor-Leste ba ASEAN.

Responsavel ADB felisita Ministru ba ninia nomeasaun daudaun ne’e nu’udar  Ministru Prezidénsia Konsellu Ministrus no manifesta vontade ADB nian atu apoia Governu hodi konkretiza ninia prioridades, hametin liután relasaun bilaterál durante mandatu Governu Konstitusionál IX nian.