Primeiru-Ministru, Kay Rala Xanana Gusmão, akompaña husi membru Governu Konstitusionál IX balun, iha loron 25 fulan-jullu tinan 2023, iha Palásiu Governu, simu Primeiru-Ministru Repúblika Portugeza, António Costa, ne’ebé daudaun ne’e hala’o vizita ofisiál mai Timor-Leste, iha loron 25 no loron 26 fulan-jullu. 
Vizita ofisiál ida ne’e, nu’udar vizita ba dala uluk xefe Governu estranjeiru hafoin Ezekutivu foun simu pose iha loron 1 fulan-jullu liubá, sei permite atu analiza dalan kooperasaun no estabelese baze ba programa futuru ida ne’ebé bele hatán ba aspirasoins nasaun rua ne’e, tanba ne’e permite Governu foun Timor-Leste atu identifika prioridade sira, atu bele aliña programa kooperasaun tuirmai, ba períodu tinan 2024 to’o tinan 2028, ho nesesidade no meta nasionál sira.
Primeiru-Ministru Antónia Costa iha ninia vizita mai Timor-Leste akompaña husi Ministru Negósius Estranjeirus, João Gomes de Cravinho, no Ministra Traballu, Solidariedade no Seguransa Sosiál, Ana Mendes Godinho.
Primeiru-Ministru, Xanana Gusmão, durante jantár (han-kalan) hodi fó onra ba vizita ofisiál António da Costa, ko’alia liu interese Timor-Leste nian atu aprende ho “esperiénsia, koñesimentu no inovasaun portugés sira nian” hodi “harii ekonomia azul ida ne’ebé sustentável iha Timor-Leste”, “la’ós de’it atu hetan rikusoin ba populasaun, maibé atu reforsa klima no oseanu”. Xanana Gusmão ko’alia liu katak “hahú hosi tasi iha setór balun ne’ebé aprezenta hanesan potensiál ida atu promove dezenvolvimentu sustentavel, hahú kedas husi setór tradisionál ba setór foun sira”. 
Iha ninia intervensaun, Xefe Governu Timor-Leste nian ko’alia mós kona-ba desentralizasaun, prioridade seluk iha mandatu ne’e nian, iha ne’ebé “esperiénsia portugés iha área administrasaun públika no munisipál nu’udar fonte koñesimentu no exelénsia ne’ebé ita bele absorve hodi avansa ba iha ita-nia prioridade”.
Durante ninia vizita mai nasaun ne’e, António Costa sei hala’o mós sorumutuk ho Prezidente Repúblika, José Ramos-Horta, no ho Prezidente Parlamentu Nasionál, Fernanda Lay.
Ajenda mós ona, Serimónia Dedikasaun ida husi Sentru Kulturál Portugés ba eis-Prezidente Portugál Jorge Sampaio, iha Embaixada Portugál Dili, hala’o vizita ba Parlamentu Nasionál, Semitériu Santa Cruz, instituisaun edukativu sira hanesan Eskola Portugeza Dili, Sentru Lian Portugés iha Universidade Nasionál Timor Lorosa’e, Sentru Juvenil Padre António Vieira no Externato São José.