Primeiru-Ministru, Kay Rala Xanana Gusmão, ohin iha Palásiu Governu simu Ministru Negósius Estranjeirus Repúblika Singapura nian, Viviam Balakrishnan, ne’ebé hala’o vizita ofisiál mai Timor-Leste, husi loron 23 to’o loron 27 fulan-jullu tinan 2023. 

Durante enkontru ne’e, Vivian Balakrishnan, reitera kompromisu Singapura nian atu apoia Timor-Leste nia adezaun hanesan membru Asosiasaun Nasoins Sudeste Aziátiku (ASEAN).

Primeiru-Ministru Xanana Gusmão agradese ba vizita Ministru Negósius Estranjeirus Singapura nian ne’ebé destaka hanesan pasu pozitivu ida ba kooperasaun entre  país rua ne’e. Xefe Governu mós hateten katak konsidera Singapura hanesan ezemplu pozitivu ida ba Timor-Leste.

Iha sorumutuk ne’e, Primeiru-Ministru Xanana Gusmão akompaña husi Ministru Negósius Estranjeirus no Kooperasaun, Bendito dos Santos Freitas, no husi Embaixadora Timor-Leste nian ba Singapura, Maria Natália Viegas Carrascalão. Ministru Negósius Estranjeirus Singapura nian akompaña husi Embaixadór Singapura iha Timor-Leste, Robin Hu, no membru sira-seluk husi delegasaun ne’e nian. 

Durante ninia vizita ofisiál mai Timor-Leste, Ministru Vivian Balakrishnan, hala’o mós sorumutuk ho membru Governu sira-seluk hanesan Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay no Ministru Negósius Estranjeirus no Kooperasaun, Bendito dos Santos Freitas, nune’e mós Prezidente Repúblika, José Ramos Horta.

Ministru Balakrishnan mós sei hala’o vizita ba empreza no organizasaun naun-govermentál sira ne’ebé iha ligasaun ho Singapura no sei partisipa iha lansamentu Asosiasaun Komunidade Singapura nian iha Timor-Leste.