Ministru Negósius Estranjeirus no Kooperasaun, Bendito dos Santos Freitas, konklui ona, iha loron 16 fulan-jullu tinan 2023, vizita ofisiál loron lima ba Jakarta, iha Indonézia. Durante vizita serbisu ida-ne’e, Ministru Bendito partisipa ona iha sorumutuk ba da-56 Ministrus Negósius Estranjeirus Asosiasaun Nasaun sira Sudeste Aziátiku (ASEAN) nian no sorumutuk sira seluk ne’ebé iha relasaun, ne’ebé hala’o ona iha loron 11 to’o loron 14 fulan-jullu tinan 2023, iha kapitál Indonézia, ho tema “Asean Matters: Epicentrum of Growth” – “Assuntos ASEAN: Episentru Kreximentu nian”. 

Eventu rejionál importante ida-ne’e, Ministru Bendito Freitas reprezenta Timor-Leste hanesan observadór dahuluk, husi ninia nomeasaun nu’udár Ministru Negósius Estranjeirus no Kooperasaun husi Governu Konstitusionál IX Timor-Leste nian, iha loron 1 fulan-jullu liubá.

Durante iha Jakarta, Ministru Bendito hala’o mós sorumutuk bilaterais ho ninia omólogus husi Estadus-Membrus ASEAN nian no parseiru dezenvolvimentu balun husi ASEAN.

Entre sorumutuk sira ne’ebé hala’o ona durante iha ninia vizita, destaka iha Sorumutuk da-30 Forum Rejionál ASEAN (ARF), Sorumutuk da-13 Ministrus Negósius Estranjeirus Simeira Leste Aziátiku (EAS FMM) no Sorumutuk da-24 husi Ministrus Negósius Estranjeirus ASEAN+3 (APT FMM).

Ministru Bendito Freitas partisipa ona mós iha Serimónia Asinatura Instrumentu Adezaun ba Tratadu Amizade no Kooperasaun iha Sudeste Aziátiku (TAC) husi Reinu Arábia Saudita.