Governu IX felisita Dom Leandro Maria Alves ba ninia elevasaun nu’udar Bispu Dioseze Baukau
Prezidénsia Konsellu Ministrus
IX Governu Konstitusionál
...........................................................................................................................
loron 20 fulan-julhu tinan 2023
Komunikadu Imprensa
Governu IX felisita Dom Leandro Maria Alves ba ninia elevasaun nu’udar Bispu Dioseze Baukau
Governu Konstitusionál da-9 Timor-Leste hato’o sinsera felisitasoins ba Dom Leandro Maria Alves ba ninia elevasaun nu’udar Bispu Dioseze Baukau, iha serimónia ordenasaun episkopál ne’ebé hala’o iha Katedrál Baukau, aban, loron 21 fulan-julhu tinan 2023.
Iha domingu, loron 23 fulan-julhu tinan 2023, oras tuku 09:00, sei hala’o Misa Pontifikál Dahuluk, momentu solene ida ne’ebé marka inísiu servisu episkopál Bispu foun Baukau nian.
Dom Leandro Maria Alves troka D. Basílio do Nascimento, bispu primeiru Baukau nian, ne’ebé mate iha loron 30 fulan-outubru tinan 2021. Dom Leandro Maria Alves hetan nomeasaun ne’ebé fó-sai liuhusi Papa Francisco iha loron 26 fulan-abril liubá.
Moris iha loron 10 fulan-maiu tinan 1974, iha Ermera, Dom Leandro Maria Alves hala’o estudu iha semináriu Kupang, Indonézia, no iha Semináriu Maiór Évora, Portugál, hafoin remata ninia formasaun teolójika iha Universidade Katólika Portugeza.
Nu’udar padre, husikedas loron 8 fulan-dezembru tinan 2006, Dom Leandro Maria Alves hala’o ona funsaun relevantes oioin iha Igreja Katólika Timor-Leste, inklui pozisaun nu’udar vise-pároku Katedrál Dili, formadór iha Semináriu Maiór São Pedro no São Paulo (2008-2011), diretór Fundasaun Diosezana São Paulo Dili no sai hanesan responsavel ba projetu oioin ne’ebé liga ba edukasaun.
Profesór Teolojia Dogmátika, D. Leandro Maria Alves nu’udar sekretáriu ezekutivu Konferénsia Episkopál Timoroan (KET) no uluk nu’udar pároku Katedrál Dili, iha ne’ebé, nia kolabora ho D.Virgílio do Carmo da Silva, arsebispu Dili nian, no iha fulan-agostu tinan 2022, nomeia nu’udar kardeál husi Papa Francisco.
Portavós Governu, Ministru Prezidénsia Konsellu Ministrus, Agio Pereira, lori Governu Konstitusionál da-9 Timor-Leste nia naran, hato’o “sinsera felisitasoins ba Dom Leandro Maria Alves ba ninia elevasaun nu’udar Bispu Dioseze Baukau” no dezeja “jornada ida ne’ebé nakonu ho sabedoria no susesu iha lideransa Dioseze nian”, no subliña “konfiansa ne’ebé Dom Leandro Maria Alves sei kontinua hala’o papél ida ne’ebé signifikativu hodi promove moris-di’ak espirituál no sosiál ita-nia povu nian”. Remata
