Governu defende ninia proposta atu retifika Orsamentu Jerál Estadu (OJE) nian ba tinan 2010 ne’e, iha Parlamentu Nasionál, iha semana ikus fulan Juñu nian.

Medida ida ne’e hetan iha Lei Orsamentu Jestaun Finanseira nian, no tuir Ministra Finanças, Emília Pires, “Governu konsidera katak situasaun oras ne’e dadauk justifika duni atu halo orsamentu retifikativu  ida ne’e tanba iha buat barak mak seidauk hala’o. Iha projetu barak mak oras ne’e hala’o hela, projetu hirak ne’e presiza lori ba oin, tanba ne’e mak, presiza iha esforsu orsamentu nian ida atu projektu hirak ne’e bele hetan fatin iha tinan ida ne’e nia laran. Ami konsidera katak la iha sentidu bainhira atraza projektu hirak ne’e tan de’it la iha osan”.

Orsamentu retifikativu ne’e prevee ona atu aumenta tan osan dolar tokon 178 ba tokon 660, ne’ebé Parlamentu Nasionál aprova, iha Novembru liubá, hodi sai OJE tinan 2010 nian.

Ministra Finanças koalia kona-ba Governu nia ambisaun (hakarak) atu hetan dezenvolvimentu ida sustentável, lalais no efikás ba Timor-Leste: “Bainhira ita hetok hala’o, bainhira ita hetok implementa, mak ita nia rain mos hetok la’o ba oin. Tuir hau koalia nanis ona katak, normalmente nasaun ida tenki lori tinan barak atu harii-a’an, maibé iha mós nasaun balun ne’ebé mak lori de’it tinan 30 atu harii-a’an. Timor-Leste hakarak tama iha klibur nasaun hirak ne’e nia laran ne’ebé sira nia ekonomia hetan milagre, no liu husi investimentu mak ita bele to’o iha ne’ebá”.

 

Atu hetan informasaun di’ak, bele rona hosi entrevista Ministra Finansas iha programa “ Adeus Konflitu, Benvindu Dezenvolvimentu” iha Rádio Timor-Leste, iha frekuénsia 91.7 – lian Tétum, Terça-feira, 22 Juñu, tuku 19; lian Portugés, Sábado, 26 Juñu, Tuku 19:30 h