Primeiru-Ministru, Kay Rala Xanana Gusmão, iha loron 17 fulan-jullu tinan 2023, simu vizita Embaixadora Portugál iha Timor-Leste, Manuela Bairos, iha Palásiu Governu, Dili.

Diplomata ne’e hato’o parabéns ba Xanana Gusmão ne’ebé foin lalais ne’e simu pose nu’udar Xefe Governu Konstitusionál IX Timor-Leste nian no informa ba Primeiru-Ministru kona-ba vizita ofisiál husi ninia omólogu Portugál, António Costa, ne’ebé ajenda ona ba loron 25 no 26 fulan-jullu. 

Durante sorumutuk ne’e, Manuela Bairos hato’o vontade Portugál nian atu iha kontinuasaun ba kooperasaun bilaterál entre Portugál no Timor-Leste iha área oin-oin. Diplomata ne’e koa’lia liu importánsia kooperasaun iha setór edukasaun no formasaun iha lian portugés, no mós iha fortalesimentu setór administrativu no seguransa sosiál. Aleinde ne’e, diskute mós planu atu apoiu iha setór justisa no iha área prioritária sira seluk, inklui kooperasaun iha defeza no seguransa.

Vizita ofisiál Primeiru-Ministru, António Costa mai Timor-Leste hanesan oportunidade ida atu hakle’an relasaun entre país rua no hametin lasu amizade no kooperasaun.