Programa hosi IX Governu Konstitusionál ohin entrega ona ba Prezidente Parlamentu Nasionál, Maria Fernanda Lay, hosi Vise-Ministru Asuntus Parlamentares, Adérito Hugo da Costa.

Iha ninia Programa, Governu sintetiza polítikas públikas prinsipais ne’ebé sei adota durante mandatu ne’e, ho objetivu atu reforsa no otimiza setores governasaun nian no sira-nia rekursus, hodi habadak dalan atu transforma vizaun husi Ajenda Dezenvolvimentu Sustentavel 2030 no Planu Estratéjiku Dezenvolvimentu 2011 – 2030 nian hodi sai realidade.

Governu ne’e solisita mós ba Parlamentu Nasionál hodi aprova votu konfiansa ida, bazeia ba kompromisu firme no determinadu hosi Governu atu implementa ninia Programa, ho objetivu atu promove dezenvolvimentu, prosperidade no moris-di’ak ba sidadauns timorenses.

Programa ne’e kompostu husi área prinsipál neen, hanesan tuirmai: Reafirmasaun Estadu Direitu Demokrátiku, dezenvolvimentu kapitál sosiál, dezenvolvimentu infraestruturas, dezenvolvimentu ekonómiku, konsolidasaun governativa no boa governasaun, nune’e mós kombate hasoru korrupsaun.