Primeiru-Ministru, Kay Rala Xanana Gusmão, ohin simu vizita husi Takei Shunsuke, Ministru Estadu Negósius Estranjeirus Japaun nian, iha Palásiu Governu, Dili. 

Iha vizita ne’e, Governante japonés ne’e entrega karta ofisiál felisitasaun ida husi Primeiru-Ministru Japaun, Fumio Kishida, ba Xefe Governu kona-ba ninia nomeasaun foin daudaun ne’e hanesan Primeiru-Ministru Governu Konstitusionál IX.

Takei Shunsuke sente kontente no onradu tanba reprezenta Primeiru-Ministru japonés iha vizita mai Timor-Leste no reafirma kompromisu Japaun nian atu kontinua serbisu hamutuk ho Governu timoroan iha áreas prioritárias ba dezenvolvimentu nasionál.

Ministru Estadu Negósius Estranjeirus reafirma mós pozisaun Japaun nian atu apoia adezaun Timor-Leste ba Asosiasaun Nasoins Sudeste Aziátiku (ASEAN, akrónimu iha lian inglés).

Iha enkontru ne’e, Primeiru-Ministru, Kay Rala Xanana Gusmão, agradese ba vizita Ministru Takei Shunsuke no konversa ho Governante Japaun ne’e kona-ba kooperasaun ne’ebé hala’o ona entre nasaun rua ne’e, nune’e mós área foun sira ne’ebé sei hakle’an liután hafoin aprovasaun Programa Governu nian.

Xefe Governu ne’e rekoñese katak, Japaun hanesan parseiru importante ida, ne’ebé apoia ona Timor-Leste husikedas ninia independénsia, ajuda iha dezenvolvimentu infraestruturas bázikas, hanesan estrada, irrigasaun, ponte, saúde no apoiu ba dezenvolvimentu rekursus umanus no seluk tan.

Akompaña Primeiru-Ministru iha enkontru ne’e maka, Ministru Negósius Estranjeirus no Kooperasaun, Bendito Freitas, eis-embaixadór Timor-Leste nian iha Singapura, Roberto Soares no Embaixadór Japaun iha Timor-Leste, Tetsuya Kimura.